Præsidentinngorniuttut taaneqarnerpaat sisamat
Præsidentinngorniunnermut arnartatuaalluni sassartoq Hillary Clinton oktoberip 26-iani 1947-mi Chicago-mi inunngorpoq.
Hillary Clintonip politikkimini pingaartitaraa arnat pisinnaatitaaffiisa sorsuutigineqarnissaat, peqqinnissamut tunngatillugu sillimmasiisarneq, suliffissanillu pilersitsiortornissaq. Taamatuttaaq pingaartitaraa USA-mi piitsut pisuullu assigiinnginnerujussuisa nalimmassarneqarnissaat. 2003-mi Hillary Clintonip Irak-imi sakkutuuliisoqarnissaa taaseqataaffigaa, taamaakkaluartorli illuatungaatigut Præsident Bush tamatuminnga isornartorsiortarpaa, akerleriinnermut annertusaasutut taaniartarlugu. Amerikamiut sakkutuuisa angerlarartinneqarnissaannut Hillary maanna illersuisuuvoq.
Politikereq taanna 60-nik ukiulik siusinnerusukkut præsidentiusimasumik Bill Clintonimik ueqartoq 2000-imi senatorimut New Yorkimi qinigaavoq 2006-imilu qinigaaqqilluni.
Amerlaqisunit Hillary USA-mi avissaartuutitsilersussatut isigineqarpoq, isumasiuinerillu eqqoriaapput qineqqusaarnermini sallertut inissisimagallassasoq.
Unammillertaa Barack Obama aggustip sisamaani 1961-mi inunngorpoq.
Taassuma aamma USA-p sakkutuuisa Irak-imiit angerlarartinneqarnissaat Hillary-tulli qineqqusaarutigaa. Piitsut piitsuujunnaarsinneqarnissaat, peqqinnissamillu sakkortusaasoqarnissaa qineqqusaarutigaa.
Barack Obama Amerikami demokraatit tunuliaqutaralugit 2005-imi Illinois-imi senatorimut qinigaavoq.
Obama qinigaassagaluaruni siullersaalluni qernertormiuni præsidentinngussagaluarpoq. Angutaa Kenyameersuuvoq arnaalu amerikarmiuulluni. ”Neriunneq” taannaralugu qineqqusaarpoq, partiillu akunneranni suleqatigiinnissaq innersuussutigisarlugu.
Barack Obama nuliaqarpoq marlunnillu paneqarlutik.
Qineqqusaartuni nuannarineqarluartut ilagaat republikaneriusoq inatsisilerituutullu ilinniagaqartoq Rudolph Giuliani, taanna 1944-mi maajip 28-ani inunngorpoq, New York-milu 1994-imiit 2001-p tungaanut borgmesteriuvoq.
Taassuma qineqqusaarutigaa akileraarutitigut annikillisaavigineqarnissaq aammalu pinerlunnerit akiorneqarnissaat, akerleraattaaq amerikamiut sakkutuuisa Irak-imiit angerlarartinneqarnissaasa piffissaliivigineqarnissaa.
Taanna pingasoriarluni katittarsimavoq, borgmesterinngorninilu sioqqullugu anngiortumik ikiaroornartumik eqqussuineq akiorniarlugu annertuumik sorsuutiginnittarsimanini ilisimaneqaatigaa.
Republikanereqataa John McCain aggustip 29-iani 1936-mi inunngorpoq.
John McCain innuttaasut sinnerlugit sinniisoqarfimmi 1983-miit 87-mut ilaasortaavoq, aammattaaq 2000-mi præsidentinngorniunnermut qineqqusaaraluarpoq George W. Bushimulli ajorsarluni.
71-nik ukiulik McCain Vietnamimi sorsoqataasimavoq, ukiullu tallimat Vietnamimi parnaarussatut tigusaaqqasimavoq allaat naalliutsitaasarsimalluni.
præsidentip Irak-imi sakkutuuleeqqinnera John McCainip isumaqatigaa, nunanulli allanut politikkip sukanninnginnissaa erseqqissaassutigisarlugu, ilaatigut Buship naalliutitaanerit pillugit politikkerisaa pillugu sakkortuumik illuatungiliisarpoq.
