Præsidentinngorniunnissamut aningaasat atugassat aatsaat taama amerlatigaat
USA-mi præsidentinngorniunneq aatsaat taama akisutigaaq. Qinersineq aappaagu novembarip qaammataani pissaaq, qinigassanngortittut præsidentinngorniarnissaminnut aningaasanik katersisarput, aningaasallu aatsaat taama amerlatigipput, katillugit 1,3 milliardi koruuninik katersisoqarsimammat.
Aningaasat tapersiisunit tunissutaasarput, imminnullu tv-kkut nittarsaannissamut atorneqarajullutik. Qinigassanngortittut katersaasa annertussusaat takutikkajuttarpaat qanoq tapersersorteqartiginersut.
Siornatigut præsidentiusimasup Bill Clintonip nulia Hillary Clinton, parteeqatiminit Barack Obamamit qaangerneqarsimavoq, Obama katersinermini rekordiliilluni 180 millioni koruuninik katersisimagami.
Republikanerip John McCainip qineqqusaarnerani akerlianik pisoqarpoq, tassa McCainip aningaasaatai nungulermata.
Sulisuminik soraarsirsisariaqarsimavoq, qineqqusaarnermilu iliuusissat pilersaarutillu allanngortinneqarlutik.