Præsidentimut qineqqusaarnermi dollarsit millionerpassuit atorneqarput
Inatsisartunut Folketingimullu Inuit Ataqatigiit sinnerlugit ilaasortap, Juliane Henningsenip, USA-mi præsidentimut qineqqusaarneq qanimut malinnaavigaa. Juliane Henningsen USA-mut qaaqqusaalluni angalavoq, naalagaaffiillu arlallit tikeraareerpai.
novembarip 02-at 2008 17:26
- Malinnaalluni pissanganaqaaq sakkortullunilu. Qineqqusaarnermi ussassaaruterpassuupput, qineqqusaartut tamarmik annilaarsaaruterpassuaqarput. Tupinnaqaaq aningaasarpassuit ussassaarutinut atorneqartut takullugu. Qineqqusaarniaraanni millionæriusariaqarpoq, aningaasanillu katersillaqqittariaqarluni.
- Isumasiuinerni oqarasuaatit nunamut atasuinnaat atorlugit misissuisoqarsimavoq, taamaallaalli angallattakkamik oqarasuaatillit akornanni misissuinerit takutippaat Barack Obama ajugaanissaminut qanittuararsuusoq.
- Barack Obamallu siuaqqanera ilimagisamit immaqa annertunerujussuuvoq, Juliane Henningsen oqarpoq, isertuutinngilaalu Demokratit qinigassanngortitaat nammineq tapersersorini.
