Professori: Tartupaluk qeqqatigut avinneqarsinnaavoq
Danskit illersornissamut ministeriat, Gitte Lillelund Bech sapaatip akunnerani kingullermi Canadami Ottawamiitillugu, Canadamiut aviisiannit National Postimit apersorneqarluni oqarpoq, atorfilittatik qanimut suleqatigiittut, neriuutigalugulu ukiup tulliuttup ingerlanerani Tartupaluk pillugu aaqqiissutissamik nassaartoqarumaartoq.
- Aaqqiissutissamik nassaarniartoqarnera qanoq inerneqarumaarnersoq ilisimanngilara, Canadamiut aaqqiissutissamik ajunngitsunik takussutissanik saqqummiisut tusarpakka, uagut aamma taamaliussaagut, taamaalilluta ataatsimoorluta aaqqiissutissamik nassaarniassagatta, Gitte Lillelund Bech oqarpoq.
- Inuiaat pisinnaatitaaffii pillugit professori canadamioq, Michael Byer aaqqiissutissanik marlunnik aaqqiisoqarsinnaanerannik isumaqarpoq. Tartupaluk qeqqatigut avinneqarsinnaavoq, Danmark Canadalu Tartupalummi killeqarfiliorlutik, imaluunniit Tartupaluk Canadap Danmarkilluunniit oqartussaafigilersinnaavaa, Michael Byer oqarpoq.
Tartupalummi uuliamik aatsitassanillu nassaassaqarnera ilimagineqarpoq, aammalu Sullualuk aqqusaarlugu imaatigut angalasalernissamik Canada ammaappat, Tartupaluk iluaqutigineqarsinnaassalluni.
