Professori: Kalaalinngorsaaneq Namminersorlutik Oqartussanut ajornartorsiortitsivoq

Ajornartorsiutit sooq taama amerlasimatigisimanersut Informationip nalilersorniarsaraa, Namminersorlutillu Oqartussani atorfilittat akornanni ukiuni kingullerni kalaallinngorsaaneq ajornartorsiutaasimasinnaanersoq misissorneqarluni.

Taamanikkut Namminersornerullutik Oqartussaasimasuni atorfilittat nuiamerit akornanni 31 procentii ukioq 2000-imi kalaaliusimapput, ukiullu qulingiluat qaangiummata 61 procentinngorsimallutik.

Inuiaqatigiinni atorfikkaat amerlanerujartuinnartut kalaaliunerat isumatusaarnerullunilu pisariaqartoq, naalagaaffiit pissusiinut Københavnip Universitetiani ilisimatusarfimmi professorip Peter Munk Christiansenip oqaatigaa. Taanna Kalaallit Nunaanni atorfilittanik misissuisuusimavoq.

Peter Munk Christiansen isumaqarpoq kalaallit amerlanerujartuinnartut atorfinnut inuiaqatigiinni pingaarutilinnut inissisimalernissaannut anguniagaq pissusissamisoortoq. Ajornartorsiutitaqarsinnaasorli taassuma Informationimut aamma oqaatigaa:

- Atorfikkaat arlaannaannulluunniit attuumassuteqanngitsumik inissisimanissaat ajoqersuutaasarpoq, pissaaneqartorujussuummatami. Taamaammat assersuutigalugu politikkikkut aqutsisunut qanippallaannginnissaat pingaaruteqarpoq, arlaannaannulluunniit attuumassuteqannginnissaat attanneqarniassammat, Peter Munk Christiansen oqarpoq.

Kalaallit Nunaanni innuttaasut 56.000-iinnaanerat eqqarsaatigalugu kalaallinik ilinniarluarsimasunik atorfinitsitsisinnaanissaq ajornakusoorsinnaasoq, taassuma oqaatigaa, ilinniarluarsimasut ataatsimut isigalugu amerlanngimmata:

- Kalaalinngorsaasoqarnissaanik aalajangerneq kukkunerusoq oqaatiginianngilara, ilinniarluarsimasulli ataatsimut isigalugu ikittuinnaanerat eqqarsaatigalugu arlaatigut aporfissaqartassaaq, naalagaaffiit pissusiinik immikkut ilisimatusarsimasoq, professeri Peter Munk Christiansen, aviisimut Informationimut oqarpoq.