Professor: Namminersorneq pillugu isumaqatigiissut pitsaasuuvoq

- Tamanna ilorraap tungaanut ingerlaneruvoq namminersornermut eqqissilluni ineriartuaarneq tassa nalinginnaasumik namminersulernissamut, isumaqarpungalu tamanna ajunngivissoq.

Taamaattumik Martin Paldamip namminersorneq pillugu isumaqatigiissutip angernissaa kaammattuutigaa isumaqarlunilu taanna Kalaallit Nunaata arriitsumik imminut napatittumik aningaasarsiulernissaanut tunngavissiilluarumaartoq.

- Aalajangiisuusussaq tassaassaaq sukkavallaartumik pisoqannginnissaa, taama oqarpoq.

- Imatut oqarluta aallartikkutta, inuiaqatigiit assigiinngitsut marluk nunami ataatsimi qaqugumorsuarmut ataatsimoornissamik kissaateqanngitsut, taava suliamik ingerlatsineq sunaluunniit namminersulivinnissamut sammisoq aallartinneqartariaqarpoq, namminersulivinnerlu taanna politikkimuinnarmut tunngasariaqarani aammattaarli aningaasarsiornermut tunngasariaqarluni. Politikkikkut namminersulivinnissaq aningaasarsiornikkut namminersulivinnerunngitsoq arlaatigut eqqumiitsortaqarpoq, taannali aammattaaq aningaasarsiornermut tunngasuusariaqarluni. Tassalu imaappoq aningaasaqarnermik isumalluuteqarnerujussuarmit anisoqartariaqartoq. Tassa arlaatigut iliornikkut ikaarsaariarnermi aaqqissuussisoqartariaqartoq ataatsimoortumillu tapiissutit Kalaallit Nunaata aningaasarsiorneranut naleqqiullugit kigaatsuarannguamik ikilisikkiartuaarneqarlutik. Tamatuma nukingiuppallaarnera ajutoorujussuarnerussaaq, pissutigalugu Kalaallit Nunaata aningaasarsiornerata niuerfiit eqqarsaatigalugit assorsuaq eqqumiitsuummat. Taamaattumik ikaarsaariarnermik aaqqissuussineq sivisooq pisariaqarpoq, tassaliuna tamanna isumaqatigiissutikkut matumuuna pissarsiariniarneqartoq, tamannalu immaqa iluatsissinnaassaaq, isumaqarpungalu periarfissagissaartoq.

Taava tassa illit siunnersuutit aningaasaqarneq eqqarsaatigalugu unaassaaq angernissaq?

- Kalaaliusuuguma taamaaliussagaluarpunga.