Prins Joachimip Mælkebøttenimi sulinerit nersualaarpai
Illumik taamatut ittumik pisariaqartitsisoqanngippat suna tamarmi ajunnginnerussagaluarpoq, prins Joachim oqarpoq. Aningaasaateqarfimmit aningaasaliissutigineqartut atorluarneqartut takuvai tamannalu nuannaarutigalugu.
Aningaasaateqarfiup Det kongelige Grønlandsfonden ukiut sisamat matuma siornatigut meeqqat illuata Mælkebøttenip ingerlanneqarneranut 25.000,00 koruunit missaanik aningaasaliivoq.
Siulittaasup Prins Joachim-ip takusani pillugit ilaatigut oqarpoq, aningaasaliissutigineqartut ajunngitsunik kinguneqartunik atorneqartut.
- Meeqqat atugarliortut illumut Mælkebøtten-imukaanneqartartut ajunngitsunik pissuseqalernisaanik sullinneqarnerat pisariusuuvoq, suliarlu taamatut ittoq tapersersueqataaffigalugu aningaasaliiffigalugulu nuannerpoq minnerunngitsumillu takullugu, Prins Joachim meeqqat inuusuttullu illuat Mælkebøtten ullui pulaareerlugu taamatut oqarpoq.
- Meeqqat inuusuttullu illuat atorluarneqartoq takullugu nuannerpoq, amerlasuut ikiorneqarput, isumaqarpungalu aningaasat atortullu annitsikitsut atorlugit sorpassuarnik angusaqartoqarsinnaanera illumi sulinermi maligassiulluarsinnaasoq, Prins Joachim oqarpoq.
Prins Joachimip Kalaallit Nunaanniinni nuannaarutigaa.
- Nuannertuaannarpoq, prins joachim oqarpoq, erninilu marluk Prins Nikolai aamma Prins Felix nuannisarsimasut oqaatigaa, taakkualu misigisanik takusanillu pisuunnguallassimasut nuannisartullu unnerpai.
Meeqqat inuusuttullu illuata Mælkebøtten-mi siulersuisuni siulittaasup Henrik Sørensenip nuannaarutigaa Mælkebøtten kunngikkormiunit aappaassaa pulaarneqarmat, tamanna nuannaarutigalugu akuerisaanertut tatigineqarnertullu isigalugu.
