Prins Harry aamma Meghan Markle katittut
Prinsip 33-nik ukiullip filmiliartittartoq 36-nik ukiulik Sankt George-kapellemi katippaa.
Katittorsiornermi qaaqqusat 600-t missaanniittut najuupput, tamatuma saniatigut innuttaasut kunngikkormiullu sulisui katillugit 2000-it aamma qaaqquneqarlutik.
Katititsinermi dekani, palasi David Conner aamma ærkebiskoppi Justin Welby katititsisuupput.
Katittut imminnut angerfeqatigereersullu oqaluffissuup silataani inuppassuit nuannattut tusarsaassapput. Katittut oqaluffissuarmit anillammata inunnut 100.000-it missaanniittunut anillapput.
Prins Harry aamma Meghan Markle imminnut angerfigeqatigereeramik pisortatigoortumik Susseximit hertugimik hertugindemillu taaguuteqalerput.
AAMMA ATUARUK Prins Harry isiginnaartitsisartumut katittussanngortoq
Kaffi naneruutillu
Tuluit Nunaanni persuarsiutigineqartumik katittorsiorneq Nunatsinnit aamma malinnaaffigineqarpoq.
Qallunaat Nunaanni kunngikkormiunik malinnaalluartartup, Ruth Holmip Tuluit Nunaanni pisut qanimut aamma malinnaaffigai, ullaarlu itiaarsinnarluni siullermik kaffiliorpoq naneruutillu ikillugit.
- Misigisaq angeqaaq, nulianngortoq uummatigissuuvoq aamma uinngortoq, katittullu takullugit assorsuaq attortinnarpoq, Nuummeersoq, Ruth Holm oqarpoq nangillunilu:
Katittut kusanaqaat aamma Diannap toqunera pillugu oqimaatsumik atugaqarnikuupput, taamaattumik pisoq assorsuaq attortinnarpoq, kunngikkormiunik nuannarisalik, ukiorpassuarnilu malinaasoq, Ruth Holm KNR-imut taama oqarpoq.
Katittut nalliussiniarlugit marloriarluni ilasseqatigiittoqarpoq, siullermik Dronning Elizabethip kingornalu prins Harryp angutaata, prins Charlesip siuttuuffigisaannik.
Ritzau naapertorlugu oqaluffissuup eqqaani inuit 100.000-it missaanniittut katersuussimapput.