Preben Lange toquvoq
Preben Lange 1979-imi namminersornerulernitsinniit 1991-ip tungaanut Inatsisartuni ilaasortaavoq, taamatullu aamma piffissami 1979-imiit 1987-imut Folketingimi ilaasortaalluni.
Preben Langep, ulluinnarni taaneqartarneratut Perip, naalakkersuinikkut anguniakkani nalornissutiginngisaannarnikuuai, taamaattumillu qinikkatut suleqatiginikuusarpassuisa nipaa ersarissoq ilaarunnartumillu qungujunnartunnguanik nuannarisaqarnera eqqaamassavaat.
Preben Langep politikki qimareerlugu ukiuni arlalinni nappaammik ilungersunartumik napparsimalernissami tungaanut Paamiuni ilinniartitsisuuvoq.
- Perip qimatai eqqarsaatinniitippakka. Eqqaaneqarnera ataqqinartuuli. Inatsisartut siulittaasuat Josef Motzfeldt eqqaaniaalluni taama allappoq.
Siumup siulittaasua Aleqa Hammond aamma eqqaaniummik allappoq.
- Nunatsinni innuttaasut nammineerlutik nunamik ilusilersornissaanut aammalu naalakkersornissaani sulinermi annertuumik Preben Lange Siumumi suleqataavoq. Suliaq angisooq, sapiissuseqarluni, qasujaalluni aammalu siunnerfigissaarluni angujumallugu suleqataalluarsimavoq. Preben Langep qimatai tamaasa qamannga pisumik migisinneqatigaagut.
- Ilagisimallutigu, suleqatigisimallutigu minnerunngitsumillu nunaqqatigisimallutigu nunaqqataasugut suleqataasugullu nukittuunnguallatsissimavaatigut. Preben Langep sulisimanerani ingerlatitseqqissaagut anersaava pigalugu, Siumup siulittaasua Aleqa Hammond allappoq.
