Prammit atorneri nutaarsiassaanngilaq
Umiarsuit, Assartuivik A/S sinnerlugu nunaqarfinnut pajuttartussat, nunaqarfinni umiarsualivissinnissamut takivallaarlutillu itsinertuallaarput, AG ullumi saqqummersoq allappoq.
Tamannalu nutaarsiassaanngilaq, Assartuivik A/S-imi Pisortaq Frederik Olsen oqarpoq, nangillunilu
- Prammersuit nunaqarfiinni minnerni assartuingaangatta atortarpagut.
Januaarip allaqqaataa aallarnerfigalugu Kujataaniit avannamut Sisimiut tikillugit nunaqarfiit, Tyskit umiarsuaataanit, Assartuivimmit attartorneqartunit nioqqutissanik pajunneqartalissapput.
Marsillu naanerani umiarsuup attartorneqartup aappaa Aasianniit avannamut Kullorsuaq tikillugu nunaqarfinnut nioqqutissanik pajuttulissaaq.
Umiarsuilli taakkua angissusaat isornartorsiorneqartorujussuupput. Umiarsuimmi itsinertuallaarlutillu takivallaarnitik pissutigalugit nunaqarfiit illoqarfiillu ilaanni, assersuutigiinnarlugu Kangaatsiamut talissinnaanngillat, taamaattoqarneranilu prammit umiarsuaaqqalluunniit allat nioqqutissanik assartuutitut atorneqartassallutik.
-1996-ikkunnili taamatut nunaqarfinnut pajuttarneq ingerlanneqalerpoq, soorlu ullumikkut aamma taamatut ingerlanneqartartoq, Frederik Olsen oqarpoq, nangillunilu
- pitsaanerpaassangaluarpoq nunaqarfiit tamarmik anngajaanik talittarfeqaraluarpata, imaluunnit talittarfiit umiarsuit taliffigisinnaasaannik inissisimangaluarpata, kisianni ullumi taamaatsillugu ajornaqaaq, Frederik Olsen oqarpoq.
Umiarsuit nunaqarfinnut pajuttaatissatut toqqarneqarsimasut, ataatsimut nassarsinnaasai aningaasartuutitigullu appasinnerpaaffianiissitisinnaanerat pillugit toqqarneqarsimapput.
