PPK naalakkersuisunut siunnersuuteqarpoq

Peqqissaasut peqqinnissaqarfimmi amigaataasorujussuunerat pillugu kinguartitsisinnaanngitsut kisimik nakorsartissinnaapput.

Peqqinnissaq Pillugu Kattuffiit PPK siunissaq ungasinnerusoq eqqarsaatigalugu, Naalakkersuisut qanoq iliuuseqarnissaannik maanna siunnersuuteqarput.

Peqqissaasut Kattuffianni, taamaalillunilu aamma PPK-mi siulittaasoq, Karin Holler, siunnersuutit pillugit ima oqarpoq:

- Immikkut ittumik sulisussanut aningaasaliisoqarnissaa siunnersuutigaarput. Immaqa sulisooreersunut bonusisitsisalernissaq eqqunneqarsinnaavoq, aammali allatut iliorluni sulisussarsiortoqartalersinnaalluni, Karin Holler aallartippoq.

Periarfissat ilaattut tikkuarpaa assersuutigalugu Nuummi peqqissaasunik SANA-p avataani suliffilinnik taartaasartoqalernissaq.

- Nalunngikkaluarpara peqqissaasut sapaatip-akunneranut nalunaaquttap akunnerini 40-ni sulereerlutik qasusaqisut. Imaassinnaavorli ilaqartut SANA-mi immikkoortortat ilaanni peqqissaasutut atorfilinnik, immikkoortortami allami taartaarusussinnaasunik. Imaassinnaavoq aamma kommunimi peqqissaasutut atorfillit imaluunniit peqqissaasunngorniat ilinniarfianni atuartitsisut sulinermik avataatigut SANA-mi peqqissaasutut sulerusuttut. Tamakku piffissap ilaani taartaasinnaanerannik periarfissittariaqarput, Karin Holler oqarpoq.

Peqqissaasut illoqarfeqatigisat taartaasartunik akisoorsuarnik nunanut allanut sianerluni pissarsiunnginnermi aperinissaat, pissutsinik ilungersunarluinnartunik ilorraap tungaanut saatitsiniarnermi orniginarnerusoq, peqqissaasut kattuffiata erseqqissaatiga.

- Taakkartukkama saniatigut aningaasarsiat pillugit isumaqatigiinniarnissami tullermi akissarsiat qaffarujussuarnissaat pingaartorujussuuvoq. Pissutsillu pitsanngornissaat qulakkeerneqassappat sulisut taarseraatinngitsut akissarsiallu unamminartut pisariaqartippavut, erseqqissaavoq.

Akissarsiat qaffannissaat ilimanarnersoq aperigatsinni siunissap tamanna takutikkumaaraa oqarpoq.

- Peqqissutsimut Naalakkersuisoq Naja Petersen iluarsiissuteqarnissamut atatillugu uatsitulli isumaqartoq ullumi tusareerlugu isumalluaammeqaanga. Taamaammat aningaasarsiat pillugit Namminersornerullutik Oqartussanut marsip ulluisa qulingiluaanni isumaqatiginninniarnissarput qanoq inerneqassanersoq pissanganaqaaq, Karin Holler naggasiivoq.