Porsild taqamut iseqarsimavoq
Ukiut untritillit matuma siornagut angut taqamut iseqarluni, soqutiginarluartumik aallarniivoq.
Angut tassaavoq naasorsiooq Morten P. Porsild – Qeqertarsuarmi Angakkussarfimmi issittumi misissuisarfimmik Arktisk Stationimik 1906-imi aallartitsisoq. Nunatta kitaata qeqqaniinnera torrallataasoq, pingaartumillu ullutsinni silaannaap kissatsikkiartornera eqqarsaatigalugu misissuivissaqqissuusoq, Arktisk Stationimi maanna pisortaasoq Reinhardt Møbjerg Kristensen oqarpoq.
- Silaannaq maanna upernaakkut gradinik marlunnik kiannerusalerpoq. Tamannalu sermip uukkartartup ilorpariartorneranik kinguneqarpoq. Ajortumilli kinguneqaannanngilaq. Eqqaaginnarsiuk saarullik’ 70-ikkuni tammakareerluni maanna imartatsinneeqqilersoq. Imarmiuni aamma arferit takussaagaluttuinnartut Møbjerg Kristensen erseqqissaavoq.
-Qeqertarsuaq issittumi misissuinermi qitiulluinnarpoq, tassami nunarsuarmi mingutsitsinerup CO2-millu aniatitsinerup silaannaap kissatsikkiartorneranik kinguneqartup issittumut sunniutai Qeqertarsuarmit aallaaveqartumik misissugassaqqissuupput.
Uumasuaqqat naasullu immap ikerinnaaniittartut planktoninik taasartakkat qanittukkut ilisimatusartut misissorlugit aallartissavaat.
- Assersuutigalugu arfiviit avatinnguatsinni februaarimit apriilimut takussaasalerput. Arfiviit 42-t qaammataasakkut ukioq nassitsissutilersorneqarput, Taakkulu uumasuaqqani sorliit nerisarneraat misissussavarput, pisortaq oqarpoq.
Ukiut 100-t matuma siornagut Porsildip issittumi misissuivimmik ammaanera eqqumiiginarsinnaagaluarpoq, kisianniuna siumut isigaluni taamaaliorsimasoq.
- Qeqertarsuaq Kalaallit Nunaanni issittorujussuup issikinnerullu akornanniinnini pillugu qitiusutut ippoq, taamaatumillu silaannaap nunarsuarmi allanngoriartornerata kingunerisaanik allannguutinik misissuivissaqqissuuvoq. Misissukkallu inerineri assut pissanganassapput, Reinhardt Møbjerg Kristensen naggasiivoq.
Angakkussarfiup ukiunik 100-nngortorsiornera nalliussiniarlugu Qeqertarsuarmi ippassaq nerersuaqatigiinneqarpoq. Misissuiviup ulluinnaqarnera aqagu aallarteqqissaaq, sapaatip-akunneratalu ingerlanerani pinngortitalerisunngorniat 17-it, qaammammi ataatsimi misissuisussat tikissapput.