Poq poq poq nersornaaserpaat

Erinniortumut taalliortumullu nersornaat John Geisler Sandgreenimut, nipilersoqatigiinnit Sussat-neersumut, tunniunneqarpoq, erinarsugaat nuannarineqaqisoq "Sila qaammareerpoq" taakku ilaatigut ilisarnaatigaat.

John Geisler Sandgreenip nersornaaserneqarneranut Koda ilaatigut ima tunngavilersuivoq: 'Taallat ilarpassui tissinartumik kalaallisut-tuluttullu erinarsornertaqaraluartut, nipilersoriaaseq ilumoorsaarussamik ingerlataavoq, nipilersoriaaseq oqinnerusoq pop-rockiunerulluni, nipilersoqataasut pikkoriffigisaminnik nipilersuutinik atuinermikkut sunneeqataaffigilluarsimasaat'.

Isumalluarnartumut nersornaat Jenseeraq Olsenimut Angutimmarik Petersenimullu, nipilersoqatigiit Uummammeersunut, tunniunneqarpoq. Taakku siorna saqqummersitseqqaarput.

Naliliisartut tunngavilersuutaanni ilaatigut ima allassimavoq: ' Saqqummersitsisorpassuarnit, ukioq taanna ilisarisimaneqalersunit, Jenseeraq aamma Angutimmarik ersarissumik allaanerussuteqarput, nipilersoriaaseq rockiunerusoq sallaatsoq, funk-rockimut bluesimullu eqqaanangajattoq, tunngaviusumik niperalugu Nunatsinnut saqqummiukkamikku, imminnut ataqatigiilluartumik pakkusimasutut ittut'.

Ataqqinaammillu nersornaat erinniortumut, erinarsuusiortumut, cd-nik saqqummersitsisartumut aamma tusarnaartitsinernik festivalinillu aaqqissuussisartumut, Peter Olsenimut, tunniunneqarpoq. Tunngavilersuummi ilaatigut atuarneqarsinnaavoq, Peter Olsen inuusuttuaraallunili nipilersoqatigiinni assigiinngitsuni nipilersoqataasarsimasoq, soorlu Tupilakkunni. Peter Olsen minnerunngitsumik tassaavoq nipilersoqatigiit Nunatsinni immaqa nuannarineqarnerpaat ilaasa Olsen Kidsikkut tunulequtaat.

Tunngavilersuummi ilaatigut ima allassimavoq:  'Aasianni nipilersortartut peqatigiiffianni 1998-imi siulittaasunngorpoq, Tassani sulinermini isumassarsiffigaa aallarnerlugulu NIPIAA Rock Festival, ukiuni aqqaneq marlunni aaqqissuuttarnerini suli siuttuuffigisani'.