Poorskilernerani tussiutaasanik erinarsorput qittallutillu

Poorskileqaaq, suummita erinarsuutigineqassappat. Soorunamigooq qernertormiut tussiutaasaannik Gospelimik erinarsortoqassaaq. Tamanna Nuummi, Nipilersornermik Atuarfimmi, meeqqanit inuusuttuaqqanillu 50-it missaanniittunit ulluni tallimani sungiusarneqarpoq. Sungiusaasuuvoq erinarsoriaatsimik Gospel-mik immikkut paasisimasalik, Ole Jørgensen. Sungiusarnerminni erinarsorput, ersaattaapput qitillutillu. Angajoqqaanut ualimanna tusarnaartitsineqarpoq, suleqaterpullu, Per Jensen, sungiusarneranni alakkaappoq...

oqaloqatigaalu erinarsoqataasoq, Ariana, Nipilersornermillu Atuarfimmi ilinniartitsoq, Per Rosing.

Ariana ima unnersiorpoq:

- Nunanneqaaq Gospelimik ilinniarluni, kisianni ilaatigut sapernalaartarpoq tuluttuinnaq erinarsortaratta.

Per Rosing ima oqaluttuarpoq:

- Meeqqat qulit peqatigalugit siorna Odensimukaratta, Nordbosangertunut peqataajartorluta, Nunat Avannarliit tamarmik peqataaffigisartagaannut, kalaallillu perngarlutik taamani peqataapput. Meeqqat ilaat tallimat qernertormiut tussiutaasaannik erinarsoramik, Ole Jørgensen ilinniartitsisoralugu, pikkorippallaaqimmallu aalajangerpugut Kalaallit Nunaannut tikisikkumallugu, aperigatsinnilu qujanartumik akuersivoq. Maannalu maaniippoq, Nuup Komuneata akiligaanik, Nipilersornermut Atuarfik aqqutigalugu, tikisipparput, taamaalillunilu ullut tallimat ingerlaneranni pikkorissaavoq, Per Rosing unnersiorpoq.

Meeqqat inuusuttullu Gospel-imik erinarsorlutik ualimut tusarnaartitsipput Nuummi Inuusuttut Siuarsartut illuutaanni.