Poorskikkunni sila
DMI-mi silasiortoq, Bill Vejdgreen Kangerlussuarmiit taama nalunaarpoq. Sila aqagu suli nillerallassaaq tallimanngornerulli tannaartup ingerlanerani kujataaniit neruminnerulissaaq.
Tallimanngorpat sinerissami nittaalaraluariarluni kiatsikkiartulerpat kujataani siallileqqaariarluni sialuk avannamut siaruaakkiartussaaq kiatsissallunilu. Tunumi silagissaaq kiatsikkiartussallunilu.
Arfininngorpat poorskikkunnilu sila nikerassaaq siallertarluni isikkivilulluni kiaannarallassallunilu.
Qeqertarsuup Tunuani nillernerulaassaaq nittaallertarluni Upernaviullu eqqaaniit avannamut silagissaaq issilluni seqinnertarsinnaassallunilu. Tasiilap eqqaani sila kiatsikkiartortillugu erseqqarlussiartulissaaq, Ittoqqortoormiuni silagissaaq issilluni seqinnertarlunilu.
Tassa poorskikkunni sila isseqannginnerussaaq taamaammallu aamma erseqqarlulertassalluni.
Ataasinngorpat poorskip aappaani sila nillertikkiartoqqilissaaq Kujataani Kitaanilu nittaalleqqittalerluni.
