"Politistationen" KNR TV-mi takutinneqassaaq

’Politistationen’ tassaavoq Danmarkimi politiit sulinerannik TV3+-mit nangeqattaartuliaq.TV-qarfimmi tassani aallakaatitassiortartut Nuummiissimapput politiillu illoqarfimmi sulinerat malinnaaffigalugu. Immikkoortut sisamat sisamanngornerni tulliuttuni sisamani KNR TV-iikkut takutinneqassapput.
Allattoq Louise M. Kleemann
maajip 03-at 2011 08:58

Immikkoortumi siullermi annaassiniarnermi aqutsisoq Carl tuaviinnaq mittarfiliartariaqalerpoq, Islandimiut timmisartuat minnermini ajutoorsimammat. Pissutsinik tamakkiisumik takunnissinnaanissaq ajutoornerullu ilungersunartup naliliiffiginissaa akisussaaffigaa.

Politiip qallunaap Michael Nuummut suliartortitaasimasup imerniartarfimmi niviarsiaraq ukiukitsoq arnamiit nakuusertumit saassunneqarsimammat aggersarneqarpoq. Olavalu inissiami ikiaroornartuerniartoqarneranik nalunaarummik tigusaqarpoq, tassunnaramilu ineqartoq kamassimasorujussuaq naapillugu.

’Politistationen’ immikkoortoq siulleq KNR TV-mi sisamanngornermi maajip tallimaani nal. 22.00 aallakaatinneqassaaq.

Aallakaatitat aallaqqaammut qallunaatuinnaq takutinneqassapput, kingornali kalaallisuunngortillugit takutinneqassallutik.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq