Politimesterip imminut toquttumik suliaq nangikkumanngilaa
Hans Haahr-ip oqaluttuarnera erseqqarikkaluaqisoq massakkut Politiit qullersaasa suliaq ammaqqikkusunngilaat.
Atuakkiortummi tusagassiortullu Ellen Stampe-p suliaq pillugu pappialat siorna takujumagaluarmagit itigartinneqarpoq, suliarlu ammaqqinneqassanngitsutut aalajangiunneqarluni.
- Suliaq takujumaneqariarmat ammaqqissanerlugu pissutissaqarnersugut paasiumallutigu atuaqqissimavarput, taamaattoqarsorinngilarpulli, Politimester Bjørn Bay oqarpoq.
Hans Haahr Pedersenilli eqqumiitsorpassuit saqqummiussai salluliuutaanersut politimesterimut apeqqutigigaarput.
- Hans Haahr Pedersenip suliamut tunngasunut oqaaserisimasai oqaaseqarfigerusunngilakka, pisulli ukiorpassuit qaangiutereeraluartut Hans Haahrip nipangersimaannarsinnaannginnera paasisinnaalluarpara, Bjørn Bay oqarpoq.
Toqutsisimanermulli suliat qanganitsinngisaannarpata taava maanna taamatut saqqummiussinera soqutaannginnami?
- Ilumoorluinnarputit, oqareernnittuulli suliap pappiliartai ukiup affaata matuma siorna atuaqqereerpavut, tassalu suliap ammaqqinneqarnissaa peqqutissaqarsorinatigu.
Aamma Abel Egede-ugaluaq ilisarisimavara, massakkullu politidirektøriusoq Jørgen Meyer ilisarisimallugu. Aamma angutit taakku assorsuaq naapertuilluartuuneri ilisimavarattaaq, Politimester Bjørn Bay oqarpoq.
Taamani politimesteriusup Jørgen Meyerip Abel Egede qunugiinnarlugu suliamik ammaaqqikkusussimannginneraaneq, politiitullu qaffakkiartorniaraanni Abel Egedep kamatsinneqannginnissaanik Hans Haahr-ip oqaluttuarnera ilumoortortaqarnersoq politimesteri aperigatsinni ima akivoq:
- Allaaserisai ingasangaarmata oqaasissaqartinngilakkaluunniit, tassami ilumuunngilluinnarput, Bjørn Bay oqarpoq.
Jørgen Meyerip aviisimut AG-mut oqaaserisai Hans Haahrip pissusissamisuunngissorai, allaffimminullu majuaqqusisimanini eqqaamannginnerarpaa, suliarlu aamma eqqaamannginneralugu.
