Nunatta politimesteria Steen Thomsen suleqatiminit isornartorsiorneqarnerminut akissuteqarpoq.
Nunatta politiivini qullersatut ilinniarneq, naatsunngorlugu POL-imik taaneqartartoq, nunatsinni siorna ilinniarneqarsinnaajunnaarpoq, Danmarkimullu nuunneqarluni.
Siornatigut ilinniarsimasut nunatsinni politiinspektørinngorsinnaasarsimagaluarput, Danmarkimili ilinniarsimanissaq maanna piumasaqaataalerpoq.
Ilinniagaq Politiets Overordnede Lederuddannelse-mik ateqarpoq, ulluinnarnili POL-imik taaneqartarluni.
Kalaallit Nunaanni Politiit peqatigiifffiata siulittaasuat Aqqaluk Petersen isornartorsiuinermini oqarpoq POL-ertarnerup Danmarkimut nuunneqarnerani kalaallit ilinniarluarsimasut annaaneqarsinnaasut, oqarlunilu qullersatut ilinniarsimasut naalagaaffiup politiivisa ittuannit, Torsten Hesselbjergimit, suusupagineqartut.
POL-ertarnerup nuunneqarnera, ilinniareersimasullu politiisnpektørinngorsinnaannginnerat nunatta vicepolitiinspektøriata, Karl-Henrik Simonsenip aamma uggoraa.
- Soorunami isumaqatiginngilara, aamma eqqortutut isiginngilara. 1996-imiit 1999-imi naammassinissatta tungaanut pikkorissartuarsimavugut, tamatumalu kingorna pikkorissartuarsimalluta, Karl-Henrik Simonsen isornartorsiuinermini oqarpoq.
Nunattalu politimesteriata, Steen Thomsenip, isornartorsiuisut paasisinnaalluarpai, maluginiaqqulluguli kalaallit POL-ernikut nunatsinni atorfinni qaffasinnerusuni manna inissisimasut:
- Pakatsisimanerat paasisinnaalluarpara, oqaatigerusupparali POL-ersimasut maanna qaffasissunik atorfeqarmata, Steen Thomsen oqarpoq, nangillunilu:
- Nalunaarummili allassimasoqanngilaq POL-ernikut imaaliallaannaq politiinspektøinngorsinnaasut.
Nunatsinni POL-imik ilinniartoqarsinnaaleqqissanersoq Steen Thomsenip oqaatiginnaannginnerarpaa, POL-ip Danmarkimut nuunneqarnera qanittukkut aatsaat pisimammat.
Politiit nunatsinneersut POL-iunngitsumik ilinniarsimasut 13-it qullersatut siorna Danmarkimi ilinniarput, ukioq mannalu POL-imik naammassinnittoq ataasiulluni.
