Politikkikkut pisoqarfiusumi: Mittarfiliortiternissamut isumaqatigiissut atsiorneqarpoq
Nuummi Ilulissanilu mittarfiliortiternissamut tunngatillugu isumaqatigiissut marlunngornermi ualikkut atsiorneqarput.
Tamanna Kalaallit Airportimi pisortaanerup Peter Wistoftip Ritzauimut sms-ikkut uppernarsarpaa.
KNR-imiit Kalaallit Airport arlaleriarluta ullumi attaveqarfiginiartaraluarparput, iluatsinngitsumilli.
Isumaqatigissut Kalaallit Airportimit Munck Gruppenimillu isumaqatigiissutigineqarpoq.
AAMMA ATUARUK Mittarfinnik sanaartornissamik isumaqatigiissut ullumi atsiorneqassaaq
Isumaqatigiissummut atsiornissaq Nuummi Hans Egedep illorsuani ingerlanneqartussaagaluartoq, Københavnemi atsiorneqarnissaa tallimanngornermi aalajangerneqarpoq. Sunali peqqutaanersoq tusagassiorfiit ilisimatinneqanngillat.
Taamaalilluni isumaqatigiissut nunatsinnut annertooq Danmarkimi atsiorneqarpoq.
Siumut politikikkut aalassassimaartoq
Politikikkut aalassassimaartoqaraluartoq isumaqatigissut atsiorneqarpoq.
Siumut Inatsisartuni ilaasortaatitaanni quliusuni taakkunannga arfinillit Naalakkersuisunullu Ilaasortaq Erik Jensen ilanngullugu siulittaasup tunuarnissaanik piumasaqarlutik atsiortuupput.
AAMMA ATUARUK Aningaasaqarnermut ataatsimiititaliap mittarfiliortiternissamut isumaqatigiissut unitsikkusukkaa
Mittarfiliortiternissamut isumaqatigiissutip atsiorneqarnissaata unitsiinnarneqarnissaa aningasaqarnermut akileraartarnermullu ataatsimiititaliami siulittaasup tallimanngornermi unnuttoq noqqaassutigereeraalu akerleriinnerit pilerput.
Kim Kielsenip isumaqatigiissummut tunngatillugu paasissutissaatai ataatsimiititaliamit amigarpallaarsorineqarmata.
Nuummi Ilulissanilu mittarfiliortiternissaq 3,5 milliarder koruuninik naleqassangatinneqarpoq.
