Politikkikkut oqaluttuarisaanerup ilaa ullumikkut naavoq
Lars Emil Johansenip politikkeritut kinaassutsini ullumikkut iperarpaa inuussutissarsiortutullu siunissami taaneqartalissalluni. Taamaattoq suli oqaatigisinnaannginnerarpaa inuussutissarsiut sorleq aallartilernerlugu.
Politikkikkut nunatsinni oqaluttuarisaanerup ilaa ullumikkut naavoq. Lars Emil Johansen KNRimut oqaluttuarpoq ukiut 40-ut kingulliit kinaassuserisap iperarniarnera imaannaasimanngitsoq.
- Ukiut 40-ut kingulliit kinaassuserisimasama taarsertussanngornera oqittuinnaasimanngilaq. Kisianni isumalluarpunga takusinnaagakku kinguaariit tulliit nangitsinissaminnut piareersimasut. Uani Siumut kisiat eqqarsaatiginngilara. Nuannerpoq takullugu partiit tamarmik inuusuttunik sassartitsisut taakkulu suliassaminnut piareersimalluarput, Lars Emil Johansen oqarpoq.
Ilanngullugu eqqaavaa politikkimi suliniarnermini suleqatigilluarsimasani toqukkut qimagutereersut Jonathan Motzfeldt aamma Moses Olsen ullumikkut assut eqqarsaatiminiitillugit. Pingajoqqami nunatsinni politikkimi akuunerat ullumikkut naavoq.
- Ullut qulingiluat qaangiuppata 65-nik ukioqalertussaavunga. Taamatut ukioqalernermi soraarninngortoqartarpoq. Tassa tamaanga killeqarpoq naak oqareernittut tamatuma qimannissaa imaannaasimanngikkaluartoq. Kisianni aamma tulluusimaarutigaara allanngornerujussuaq apriilip 16-at 1971-mi qinigaanitta kingorna sunniuteqaqataaffigisimagakku sanarfeqataaffigalugulu, Lars Emil Johansen kingumut qiviatsiarpoq.
Taanna aamma politikkerinut inuusuttunut oqaassissuteqalaarpoq.
- Inuusuttut politikkerit tamanik ajunnginnerpaanik kissaappakka. Neriuppunga eqqaamajumaaraat innuttaasunut sinnissaanertik naalagarsuartut imminnut inissinnatik. Neriuppunga inuit kalaalimineerniarfimmiittut suliffeqarfissuarnilu pisortat assigiisillugit naalaartarumaaraat, Lars Emil Johansen oqarpoq.
Taanna maanna suliffeqarfimmik pilersitseqataaniarluni suleruttulerpoq taamalu aalajangiusimallugu ukiut marluk qaangiuppata inatsisartut qinersisoqalerpat sassarniarani.
- Maanna inuussutissarsiummik nutaamik aallartitsilerpunga. Marlunnik peqateqarlunga suliffeqarfimmik aallartitsilerpunga. Pilersaarutigaarput suliffeqarfik 2012-mi aallartikkumaarlutigu. Maannakkuugallartoq sunik suliaqassanersoq oqaatigisinnaanngikkallarpara, tamannali uterfigeqqikutsoorumaarparput pilersinnissaa qanillippat, Lars Emil Johansen oqarpoq.
