Politikeritoqqat politikerinngorlaallu qinigaapput
Nunaqarfimmi aqutsisunut partii qinigaanerpaasoq inissitsiternermi siulittaasumik toqqaasarpoq. Kangaamiuni nunaqarfiup aqutsisuinut kina siulittaasunngussanersoq ippassaq paasinarsinngilaq. Tønnes Kreutzmann Atassut sinnerlugu qineqqusaarnermini qinigaanerpaagaluartoq, Siumut partiiat taasinerni amerlanernik pissarsilluni, marlunnik nunaqarfimmi aqutsisunut isertitsivoq.
- isumaqarpunga qinersisartut isiginiarluarsimagaat ukiuni sisamani qinersivinni nunaqarfiup iluani uummaarissumik ingerlasoqarnissaa. Tønnes Kreutzmann oqarpoq.
Ukiut tulliit sisamat sunik suliniuteqassavit?
- Inuussutissarsiutitigut siuarsaanissaq qineqqusaarutinni ilaavoq, taassuma saniatigut nunaqarfimmi aqutsisut ikileriaateqarnerat tallimaninngaanniit pingasunut annertuumik nunaqqatigiittut suleqatigiinnissaq pingaartillugu taasimavara. Tønnes taama oqarpoq
qineqqusaarnermi arnat marluusut aappaat Judithe Frederiksen, Siumut sinnerlugu qineqqusaarnermini taaneqarnerpaamut tulliuvoq.
- Qinerneqarnerpaat aappaalluni, taamatut ilimasunnanni tupaallannaqaaq. Nunaqarfitta siuarsarnissaa suliniutigissavara, suliffissatigut inissaqanikkullu meeqqeriveqarnikkullu, Judithe Frederiksen oqarpoq.