Politikerit tusarnaartartunit apeqqarissaarfigineqarput

Oqalliffimmi tusarnaartartut ullaaq quliniit apeqqutaat assigiinngeqqat.

Oqallinnermi peqataapput partiit tallimat sinniissaat: Inuit Ataqatigiit siulittaasuat Naalakkersuisunilu siulittaasoq Kuupik Kleist, Demokraatit siulittaasuat Jens B. Frederiksen, Siumut siulittaasuat Aleqa Hammond, Kattusseqatigiit sinnerlugit Jakob Skade aamma Atassut sinnerlugu Knud Kristiansen kiisalu Inatsisartut siulittaasuat Josef Motzfeldt.

Inatsisartut ataatsimeeriaasiat annermik apeqquteqarfigineqarpoq, ilaatigut inatsisartuni ilaasortat ilaasa pingaartumik inuusukaajunerusut kalaallisut oqaatsinik atuinerat sooq taama ajortiginersoq apeqqutigineqarluni. Allap sooq parteeqatigiit isumaat oqallisigisanut tunngatillugu taama assigiinngitsigisarnersut apeqqutigaa, oqarluni inatsisartuni ilaasortat partiimik iluanni oqaloqatigiittarnersut ilaanni takujuminaattartoq.

Aamma ataatsimiinneq radioakkut aallakaatinneqaleraangat "tusaaqqusaaginnarlutik" oqaluttarfimmukartoqartarneri uparuarneqarput.

Naalakkersuisut siulittaasuata Kuupik Kleistip aamma Inatsisartut siulittaasuata Josef Motzfeldtip neriorsuutigaat uparuaatit tusaaniarneqarumaartut, oqarlutik ukiakkut ataatsimiinnermut naleqqiullugu upernaakkut ataatsimiinneq pitsaanerusumik ingerlasoq, soorunamilu ataatsimeeriaatsimik allannguisoqassappat nalileeqqittarumaarlutik.

Oqalliffik arfininngorpat nalunaaqutaq marlu qeqqanut aallakaateqqinneqassaaq.