Politikerit nuimasut Kangerlussuarmut tikipput
Angut USA-mi præsidentinngorsinnaalluartoq, Republikanerineersoq, Senator John McCain, naalagaaffimmit Arizonameersoq senatoreqataalu allat pingasut taakkulu malittaat ualeq manna nalunaaqutaq tallimanut Kangerlussuarmut apuupput:
Taamaalilluni danskit avatangiisinut ministeriata Connie Hedegaardip Det Konservative Folkepartimeersup inuit pilersitaannik avatangiisit mingutserneqarnerannut akiuiniarnermi suliniutit malunnaateqarnerunissaannik aammalu kinguneqarnerusumik suliniuteqartoqarnissaannik suliniarnermini alloriarnerisa annerit ilaat piviusunngortippaa.
Avatangiisinummi ministerip Connie Hedegaardip, Nunatsinni nunanut allanut tunngasunut naalakkersuisoq aammalu danskit nunanut allanut ministeriat Per Stig Møller Namminersornerullutik Oqartussat aammalu danskit naalakkersuisui sinnerlugit amerikami politikerit nuimanersaasa ilaat Kalaallit Nunaannut aggersarpaat, taakku namminneerlutik takullugulu maluginiassammassuk nunarsuarmi silaannaap allanngoriartornera qanoq pilertortiginersoq.
- Silaannaq pillugu nunarsuarmioqatigiit akornanni isumaqatigiinniartoqarnera ajunngitsumik ineriartortinneqarpoq. Alloriarnerli tullinnguuttoq pillugu USA, minnerunngitsumillu partii Republikanerit aalajangiisooqataalluinnartussaapput. Taamaammat Senatorit takutikkusuppagut silaannaap allanngoriartornerata kinguneri qanoq ersaritsiginersut, takussutissallu ersarinnerpaat ilagaat Kalaallit Nunaanni Qeqertarsuup tunuani pisut, tamaanimi sermersuup uukkarfii kilometerinik arlalissuarnik ilorparaluttuinnarnikuupput, Avatangiisinut ministeri amerikamiunik tikeraartitsinerminut atatillugu oqarpoq.
Connie Hedegaard ukiup ataaserluinnaap matuma siorna, tassa augustimi 2005-imi, iluatsilluartumik, nunat tamalaat 20-init ikinnerunngitsut avatangiisinut ministerii Ilulissanut tikeraarsarpai, tassani siunertaalluni, avatangiisinut ministerit pineqartut namminneq takullugulu misigissammassuk silaannaap allanngoriartornera qanoq sukkatiginersoq. Tikeraartitsinermut tassunga atatillugu Connie Hedegaard ilaatigut imatut oqaaseqaateqarpoq:
- Soorlu iluliarsuup ilaannamininngua takuneqarsinnaasartoq, mingutsitsinerup inunnit pilersinneqartup kingunipilui annikitsuinnaasutut ullumikkut misigaavut. Sinneri puttallariaannaallutik siunissamilu qanittunnguami takussaalertussaapput. Taamaakkaluartoq avatangiisit mingutsaaliorneqarnissaat pillugu nunarsuarmioqatigiit isumaqatigiinniarneri arriitsuinnarmik ingerlanneqarput. Taamaammat nutaamik eqqarsarluta alloriarnerit ingerlattariaqalerpavut. Tassa Connie Hedegaard, siorna tikeraartitsimerminut atatillugu taamatut oqariartuuteqarpoq.
Nutaamillu eqqarsarluni periuseqarneq taanna aammalu nunarsuarmi angutit nuimanersarilersinnaasaata pissaaneqarnerpaarilersinnaasaatalu Senator John McCain-ip Ilulissanut aggersarneqarnera angusaqarfiujumaarnersoq pillugu apeqqut ulluni tulliuttuni maani Ilulissani toqqammavilerneqassaaq.
Avatangiisinut ministeri, Nunanut allanut ministeri, Nunatsinni nunanut allanut tunngasunut Naalakkersuisoq aammalu Senator John McCain taakkulu malittaat aqagu sisamanngornermi ullaap tungaani Ilulissanut pissapput.
