Politikerit inatsisartunut mittarfiit pillugit sukannersumik inassuteqaateqartut
Tamannalu pillugu Kommuneqarfik Sermersuumi Aningaasaqarnermut Inuussutissaqarnermullu Ataatsimiititaliaq sukannersumik inassuteqaammik nassiussaqarpoq.
Ataatsimiititaliammi nunatsinni illoqarfiit pingaarnersaanni Nuummi ineriartortoqarnera ilorraap tungaanut ingerlaannassappat takinerusumik mittarfiliortoqartariaqarsoraa.
- Kommuneqarfik Sermersuumi Aningaasaqarnermut Inuussutissarsiornermullu Ataatsimiititap mittarfiliortitsinissaq nunatsinni aalajangiinerit pingaarnerpaat ilaattut isigaat. Aningaasatigut naleqassutsimik ineriartortitsinermik aallartisartumik aningaasaleerusussuseqarnermillu ikorfartuinikkut nunarput aningaasatigut imminut napatissinnaalernissaa ataatsimoorluta qanillattorsinnaavorput, politikerit ataatsimoortumik nalunaaruteqarput.
AAMMA ATUARUK Mittarfiliorneq pioreersunilluunniit atuiinnarneq aningaasaqarnermut assigiippoq
Ataatsimiititaliaq naapertorlugu suliffeqarfiit Nuummi pilersitsinissaminnik soqutiginnittoq ukiuni kingullerni ”aatsaat taama amerlatigipput". Tamannali mittarfiup allinerneqarneratigut aatsaat pissaaq.
Tamannalu illuatungilerlugu oqariartuut aamma taamak erseqqitsigaaq. Nutaanik mittarfiliortoqanngippat Nuummut aningaasaliisussaqanngitsoq, Kommuneqarfik Sermersuumi Aningaasaqarnermut Inuussutissarsiornermullu Ataatsimiititaliaq siulittuuteqarpoq.
Avannaata Kommuniani borgmesteri, Palle Jerimiassen assingusumik oqariartuuteqarpoq:
- Mittarfiit allinngikkutsigit Kalaallit Nunaata suminngaanniit isertitassarsiornissaa assut takujuminaatsissavara, Palle Jerimiassen allappoq. Taassuma nunatsinni takornariaqarnerup nunatta aningaasaqarneranut iluaqutissartaqalersillugu ineriartortinnissaanut mittarfiit tallineqarnissaat pingaartuusoraa.
Inatsisartut mittarfiit pillugit inatsisissatut siunnersuut aqagu ataasinngormi siullermiissavaa. Siunnersuut ukiami ataatsimiinnermi aatsaat akuerineqassaaq.
AAMMA ATUARUK Mittarfimmut aqqusinniornermut 103 millionit Sermersuup aningaasartuutiginiaraa
Qeqqata Kommuniata mittarfinnik sanaartornissamut suliaq, Kangerlussuarmut kingunerluuteqangaatsiarsinnaasoq, isinik allarluinnarnik isigaaa. Kommunip mittarfeqarfik Namminersorlutillu Oqartussanit attaveqaqatigiinnermut tunngasut allat ilanngullugit suliffeqarfimmut, Qeqqata Kommuniata siunissami pigalugulu ingerlatassaani ataatsimoortillugit tigunissaat sapaatip akunnerani matumani siunnersuutigaa.
Mittarfiit pillugit inatsisissatut siunersuut Inatsisartut siullermeerlugu ataasinngorpat suliarissavaat.
Siunersuut ataatsimiinnermi aatsaat naammassillusu oqaluuserineqassaaq.
