Politikerit iliuusaat nittartakkami nutaami alaatsinaanneqassapput
- Qinikkat aalajangiisartullu allat nassuiaataasa uppernassusaat misissortarniarpakka, tutsuiginarnersut misissortarniarlugu. Allagaatinik takunnissinnaatitaaneq aqqutigalugu nassuiaatit misissortarniarpakka, inatsisileritooq Lars Bo Bjørknæs Radioaviisimut oqarpoq.
Paasisat 400-t itisilerillunilu paasiniaanerit taassuma toqqortaatigai, paasisallu taakku Aviisi.gl aqqutigalugu saqqummiutissamaarpai.
Saqqummiussassaq siulleq Jens Napaattuup eqqartussaaneranut tunngassuteqarpoq. Qinikkap nuimasup ilaata ilisimannittutut eqqartuussivimmi nassuiaataa Lars Bo Bjørknæsip saqqummiuteqqaassavaa, nassuiaatip tutsuiginassusaa misissorniaramiuk.
- Qinikkap nassuiaanermini ilaatigut oqaatigaa ilassinninnermut atugassat atornerlunnaviarnagit. Oqaluttuamut tunngatillugu paasisat taakku aqagu aqaguaguluunniit sisamanngorpat saqqummiunniarpakka. Taava innuttaasut namminneq nalilersinnaassavaat aningaasartuutitigineqarsimasut namminermut oqartussanulluunniit tunngassuteqarnersut, Lars Bo Bjørknæs oqarpoq.
Qinikkalli iliuuseriniagaat avammullu qanoq oqaaseqarnerat naapertuunnersut, Lars Bo Bjørknæsip isummersorfigerusunngilaa, nangillunilu:
- Paasisat saqqummiunneqartut sumut atussanerlugit innuttaasut namminneq aalajangissavaat, qinikkalli iliuuseriniagaat oqariartuutinut naapertuunnersut, innuttaasut namminneq isummersorfigiumaarpaat, Lars Bo Bjørknæs naggasiilluni oqarpoq.
