Politikeri aavartilluni tammartajaartoq

Pauloosie Keyootak Qikiqtarjuarmi inatsisiliortuni ilaasortaavoq. Canadami nunaqarfik taanna Kalaallit Nunaannut qaninnerpaavoq, Iqaluillu ungasinnerullugu Kangerlussuarmut qaninnerulluni.

Ullut arfineq-pingasut qaangiupput Pauloosie Keyootak ernini 16-inik ukiulik soraluanilu nassarlugit aavariarmat.

Iqalunninngaanniit Qikiqtarjuarmut aqqut 300 kilometerinik isorartussusilik atorlugu qamuteralallutik ingerlaarput. Pauloosie Qikiqtarjuarmi allaffeqarpoq, ingerlaartillutik piniarniarlutik pilersaarutigisimavaat.

Ingerlaarnermilu Ikersuaq Davis aqqutigeqqaartussaasimavaat. Aqqut taanna Nunavimmiunit angallavigineqartarpoq, tamatumuunali ajortoorfiuvoq, ilaqutariit kukkullutik sangummata.

Aqqutaani GPS-imik ilitsersuuteqarnatillu oqarasuaammik angallattakkamik qaammataasiaq atorlugu attaveqarsinnaasumik nassataqarsimanngillat.

Anorersuaqattaarpoq 30-nillu issilerluni

Nunap eqqaani piniartorpassuit Inuillu politiit ulluni arfineq-pingasuni ujaasineranni ikiuupput, iluatsinngitsumilli.

Angutit taakku pingasut nerisassaminnik taquarsimanngillat oqorsaatissaminnilluunniit tippinik nassataqarsimanatik. Taamaakkaluartoq tuttutaminnik inuussuteqarput illuikkamillu unnuiffissaminnik sanallutik.

Angutit taakku neriuutaaruttullu timmisartuaqqamit naammattoorneqarput, kingornalu qulimiguulimmit aggersakkamit Iqalunnut angerlaanneqarlutik.

Paulosie Keyootak aviisimut National Postimut oqaatigaa, nerisassaaruttullu timmisartuaqqamik naammattuuillutik. Nuannaarlutik pississaarsimapput, qulimiguulillu apuummat nuannaarnerup pianik qissasiinnarsimasut, Paulosie oqarpoq.

Aqaguani Keyootak allaffiminukaqqippoq.