Politikerertavut qinersinerup ulluani isumalluartut
Folketingimut ullumi qinersivugut. Nunatsinni qinersiviit ullaaq manna nalunaaqutaq qulingiluanut ammarput, Nuummilu Timersortarfiup silataa persuarsiorfiuvoq.
Partiit qinigassanngortitalinneersunik oqaloqateqarpugut, taakkulu qinersinerup ulluani qanoq naatsorsuuteqarnersut qineqqusaarnerlu qanoq igineraat paasiniarparput.
Folketingimi maanna ilaasortaq Siumumeersoq, Aki-Matilda Høegh-Dam, ullumi qanoq naatsorsuuteqarpit?
- Qinigaassallunga soorunami neriuutigaara. Nerioqaanga, qanorli pisoqassanersoq takulaartigu. Oqajaareerusunngilanga.
Ulloq qanoq atussaviuk?
- Ulloq naallugu inussiorlunga, tikilluaqqusillunga malunnartitsillungalu qinersiviup silataaniissaanga.
Folketingimi maanna ilaasortaq Inuit Ataqatigiinneersoq, Aaja Chemnitz, ullumi qanoq naatsorsuuteqarpit?
- Neriuppunga ulloq nuannerluinnarlunilu nuannaffiussasoq. Qinigassaq apeqqutaatinngikkaluarlugu pinngitsoorani qinersiartornissaq pingaaruteqartoq eqqaamasariaqarpoq. IA-lu Folketingimut qinigaaqqissasoq soorunami neriuutigaara.
Qineqqusaarnerit qanoq nalilerpigit?
- Qineqqusaarnerput imaannaanngeqaaq, ataasiakkaallu eqqaassanngikkaanni partiit tamarluinnangajammik IA-lu suliatsinnut aamma mamarliiniarput. Ullorli una persuarsiorfiusoq pingaartitanillu qinersisartunit anngussiviusoq eqqaamasariaqarparput.
Siumup siulitaasua, Erik Jensen, qanoq ippit?
- Ajunngeqaanga, qineqqusaarnittalu neriuuteqalerseqaannga. Taamaammat isumalluaqaanga, neriuppungalu qinersisartut qinigassanngortitatsinnik ilassinnilluassasut.
Qineqqusaarnersi qanoq nalilersinnaaviuk?
- Ingerlalluaqaaq. Qinigassanngortitavut qineqqusaarluaqaat, nunattalu inui nunarpullu pillugit qanoq suliniarnerminnik ersersitsilluaqaat. Usorsisimaaqalungalu nuannaaqaanga.
Demokraatit siulittaasuat, Jens-Frederik Nielsen, qanoq ippit?
- Nuannaarpunga. Ullumimut erinisunnikooqaanga. Qineqqusaarnerput ingerlalluaqaaq, qinigassanngortitavullu tulluusimaarutigaakka.
Ullumi qanoq naatsorsuuteqarpit?
- Qinigassanngortitavut tulluusimaarutigaakka. Isumaqarpunga qineqqusaarluarsimaqisut. Folketingimi ilaasortaatitaqalernissarput soorunami neriuutigaarput. Inuillu isummersuutaat naapertorlugit isumaqarpunga partiit annerit inangerlugit ilaasortaatitaqalinngitsoornavianngitsugut. Taamaattoqassanersorlu pissangatigaarput.
Atassutip siulittaasua, Aqqalu Jerimiassen, ullumi qanoq naatsorsuuteqarpit?
- Oqarsinnaavunga annaasassaqanngilagut. Kingullermik inernerunikuusoq eqqarsaatigalugu isumalluaannarsinnaavugut qanoq maannakkut ingerlanerput eqqarsaatigalugu. Aamma Arnannguaq Jeremiassen taavalu Aviaq Kleist tamarmik nutaraalluinnaraluarlutik tupaallannartumik ingerlapput. Qilanaariinnarsinnaavara qanoq inerneqassanersoq.
Qineqqusaarnerit qanoq nalilerpigit?
Arnannguaq Jeremiassen tupaallatsitsivoq. Taamannak takutitsilluarnera nuanneqaaq. Taamaammat siulittaasutut isumalluarfeqarlungalu isumalluartussaavunga, aamma tapersersugassaraara.
Naalakkersuisut siulittaasuat, Muté B Egede (IA), ullumi qanoq naatsorsuuteqarpit?
Tassa ulloq qinersiviusoq soorunami nalliussiineqartuaannarpoq. Uagullu tamanna qinersisartut qineqqusaarsimasullu maani peqatigalugit nuannaarluta malunnartissavarput, aamma sineriammi ikinnguterpassuagut peqatigalugit.
Qineqqusaarnerit qanoq nalilerpigit?
Tassa isumaqarpunga qineqqusaarnerit ajunngitsumik ingerlasut. Aaamma oqallinnerit annertuumik ingerlapput, aammali piffissap ilaa inuttarsiuinermut sammisoq takusinnaavarput. Isumaqarpungali sulianut suleqatigiiffissarsiornissamullu naajartornerani saatikkiartuaarneqartut, tamannalu pitsaanerpaarpaajuvoq.
Qinersiviit unnugu nalunaaqutaq arfineq-pingasunut matussapput.