Politiit ujaasinertik unitsiinnarpaat
Danmarkimi nutaarsiassaqartitsiviit ilaata TV 2 Østip nittartagaani allaaserineqarpoq, nutaanik paasissutissaasinnaasunik takkuttoqariataanngippat ujaasineq unitsinneqarallassasoq.
Politiit qulimiguulik atorlugu arlaleriarlutik ujaasigaluarput Ringsted Å-p eqqaani nuna annertoqisoq ujaasiffigalugu. Ujaasinermilu ilaatigut qimmit atorneqarput. Ujaarineqartup ilaqutai kammalaataalu apersorneqarput, bankialu alaatsinaanneqaraluarluni tamarmilli iluaqutaasinnaasumik kinguneqartitsinngillat.
- Pinerluttoqarsimasinnaaneranik erseqqissumik pasitsaassaqarsinnaanngilagut, taamaattumik nutaanik paasisaqaqqinnissatta tungaanut suliaq unitsikkallarparput, taama ullumi TV 2 Østimut oqarpoq sjællandip kitaani vicepolitikommisæri Martin Bjerregaard.