Politiit ujaasinertik nangippaat

Angutip Ruslandimiup sapaatiummalli Kulusummi tammaaneqartup, ujaarineqarnera Tasiilami politiit nangeqqikkaat, nittartakkami sermitsiaq.ag-mi allaaserineqarpoq.
Allattoq Elisa Isaksen
januaarip 08-at 2010 06:16

Politiit ujaasinertik unitsikkaluarpaat Ruslandimiorlu asimi tammarsimasutut nalunaarutigalugu.

Maannali paasinarsivoq, ujaarineqartoq Ruslandimiu 35-nik ukiulik Adel Borisov, Russit Tysklandimi aallartitaqarfianni atorfiliusoq. Tusarfiit aterminnik taasinngitsut nittartakkamut sermitsiaq.ag-mut oqarsimanerarneqarput, Ruslandip aallartitaqarfiata Københavnimiittup aamma Nunanut allanut ministeeriaqarfiup, ujaasinerup nangeqqinneqarnissaa ilungersuutigisimagaat.

Tamannali politimesterip tullianit Morten Nielsenimit sakkortuumik ilumuunnginnerarneqarpoq, asulilu oqalunnerunerarlugu.

Taassuma ujaasinerup nangeqqinneqarneranut pissutaanerarpaa, apummi tuminik soqutiginarsinnaasunik nassaartoqarsimanera, taamaammallu ujaasineq nangeqqinneqartoq. Politiit ujaasineranni qatserisartut qulimiguulillu ujaaseqataatinneqarput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq