Nuummi umiatsialivimmi Iggiaani ataasinngornermi unnuakkut savilersortoqarneranik ilisimasaqaruit, politiinut attaveqaqquneqarputit.Assi: Kalaallit Nunaanni Politiit / Grønlands Politi

Politiit savilersortoqarneranik takunnittussarsiorput

Nuup ilaani Nuussuarmi Iggiaani ataasinngornerup unnuaani savilersortoqarpoq. Takunnissimasut politiinut attaveqaqquneqarput.

Nuummi politiit Nuup ilaani Nuussuarmi savilersortoqarneranut atatillugu ilisimannittussarsiorput.

Nuummi politiit angut 37-nik ukiulik Nuummi Iggiaani umiatsialivimmi ataasinngornerup ullaassaani nalunaaqutaq ataatsimut tanneq qulingiluanngulersoq savimmik kapineqarsimasoq pillugu kalerrinneqarput. 37-nik ukiullip inuunera navianartorsiunngitsoq nalunaarutigineqarpoq.

Angut 43-nik ukiulik, savilersorsimasutut pasineqartoq, politiinit tigusarineqarpoq, inatsillu tunngaviusoq naapertorlugu Eqqartuussisoqarfik Sermersuumi killisiorneqassalluni. Pisoq pillugu politiit suli misissuimmata suliaq matoqqasumik suliarineqarpoq.

Politiit misissuinerminnut atatillugu ilisimannittunik ujartuipput, inuit Nuussuarmi Iggiaani savilersorfiup eqqaaniissimasunik ujartuillutik. Unnuap qeqqanit ataatsimut tanneq qulingiluanngulernerata tungaanut Iggiaaniissimasunik ujartuisoqarpoq.

Savilersortoqarneranut ilisimannikkuit politiinut saaffiginneqquneqarputit. Politiit oqarasuaataasa normoraat 70 14 48.

 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl