Politiit sapaatip-akunnerata naanerani ulappussimapput

Tallimanngormat akissarsisoqarnera ilaatigut pissutaalluni nunatsinni politiit sapaatip-akunnerata naanerani ulappussimapput.

Angerlarsimaffinni eqqissiviilliornerit amerlasuut orniguffigineqarsimapput, imminullu toqunnissamik sioorasaarutit pillugit orniguttoqartariaqarsimallutik.

Pinngitsaaliilluni atoqateqarsimanerit arlallit nunatsinni politiinut nalunaarutigineqarsimapput, arlaleriarlunilu annaassiniartoqarsimalluni.

Nuummi pinngitsaaliisoqarsimanera ullaaq manna nalunaaqutaq arfineq-pingasut qaangerlugit tanneq ataaseq nalunaarutigineqarpoq. Angutit marluk tassunga tigusarineqarsimapput, pisorlu misissuiffigineqaleruttortoq, Kunuk Frederiksenip, politiineersup oqaatigaa.

Arnap inuusuttup 17-inik ukiullip umiatsiaaraq Tiniteqilaamit aallarussimavaa Sermiligaamukarniarsimalluni. Umiatsiaararli motooriiarsimavoq.

17-inik ukiulik politiinut arfininngornermi ullaassakkut nalunaaqutaq tallimanut qiteqquttoq sianerpoq. Politiit umiatsiamik attartoriarlutik arnaq inuusuttoq ornippaat, ajunngitsorlu nassaarineqarpoq.

Umiatsiaq inuttaqanngitsoq Qeqertarsuarmi politiinut ippassaq unnukkut nalunaaqutaq qulit qaangilaaraat kalerriutigineqarpoq, kingornalu ujaasisoqalerluni. Angut umiatsiamiittoq periarfeerunneqarpoq, angulli umiatsiaatilik 81-inik ukiulik politiinit unnuaq nalunaaqutaq ataatsip qaangilaarnerani nassaarineqarpoq. Angut ajunaarsimasoq nalunaarutigineqarpoq, ilaqutaasullu ilisimatinneqareerlutik.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat