Politiit pillugit aallakaatitat suli ilaqarput

TV-liortut Nuummi politiit sulinerat marsimi apriimilu malittaraat. Timmisartoq ajutoorpoq, persuttaasoqarpoq, ikiaroornartuerniartoqarpoq inigisamullu akiligassalimmik anisitsisoqarluni immikkoortoq siulleq sisamanngornermi unnukkut KNR-TV-mi aallakaatinneqarmat.

Taamaattorli ajornaatsuinnaasimanngilaq politiitut sulinermi tv-liortunit malittarineqarneq ilaatigummi assiliiviup isaa politiit tuiisa qulinnguanniittarsimavoq.

- Angerlarsimaffinni eqqissiviilliortuni inuit eqqissereeraluartut kamassaqqilertarsimapput tv-liortunik najuuttoqarnera pissutigalugu, aallakaatitami malittarineqartut ilaat politeeq Ove Thomassen KNR radiop aallakatitaanut ”Iterluarnaamut taama oqaluttuarpoq.

Politiit nassuiartariaqartarsimavaat inuit pineqartut pillugit tv-liortoqanngitsoq politiilli sulinerat aallakaatitassiarineqartoq.

- Inuit ilaat peqataajumanngikkaluartut nassuiaanneqaraangamik akuerisarpaat peqataanissartik suna pillugu assiliisoqartoq nassuiarneqaraangat, Ove Thomassen taama oqarpoq.

Tassami inuiaqatigiinni pisut nuannerpallaanngitsut tv-liortut takutippaat aammalu taamatut pisoqartarsimavoq immikkoortut allat Danmarkimi politeeqarfinni immiunneqarneranni.

Nuummi politeeqarfimmi aallakaatitassianit immikkoortut tulliisa imarissavaat angerlarsimaffinni eqqissiviilliornerit politiit suliaanni akuulluinnartut. Aammattaaq takuneqarsinnaajumaarput angallanermi ajutoorneq ikuallannerlu.

Aallakaatitassiat KNR-TV-mi takutinneqartarput sisamanngornermi nal. 22.00.