Politiit piffissaqarluarput
Taamaalillutik politiit Nuup Eqqartuussivianit taperserneqarput, illersuisoq eqqartuussisup aalajangernera ingerlateqqinniarnagu aalajangerpoq.
- Tamanna kissaatigisimavarput tassami paasiniaqqissaagassat arlaqartut ilisimagatsigu. Minnerunngitsumik tillinniarfimmi teknikikkut misissuinerit misissoqqissaarnissaat eqqarsaatigalugu, tamakkumi piffisartornartarmata, politimester Bjørn Bay oqarpoq.
Sapaatip akunnerani sisamani tigummigallagassanngortitsineq tillinniarnerup immikkuullarissusaanik pissuteqanngitsoq taassuma oqaatigaa.
- Kisiannili qularutissaanngilaq nunami naalakkersuisut illorsuannut tillinniarneq immikkorluinnaq isigisariaqartuusoq, Bjørn Bay oqarpoq.
- Aammalumi unnerluunneqartut marluk sapaatip akunnerini sisamani tigummigallagasanngortinneqarnissaat ingasattajaarnerunngimmat Eqqartuusisup isumaqatigivaatigut, politimesteri oqarpoq.
Politiit erseqqissareerpaat, tillinniarnermi allanik akuusoqarsimasinnaasoq. Tilliniat nalilinnik qimataqarsimapput, allaffinnilu arlalilinni pappialat assanneqarsimallutik, taamaammallu tillinniarnermi suna siunertaasimanersoq apeqqutaasutut isigineqarpoq, ilaatigut Naalakkersisoqarfiit pisortaannit Peter Schultz-imit.
