Politiit piareersimasuutitaqarfissaat ukiortaamiit atulernavianngilaq
Politiit qitiusumik piareersimasuutitaqarfissaat pilersaarutit malillugit januaarip aallaqqaataani pisussaagaluaq, piviusunngornavianngilaq. Danmarkimi politiit siorna aningaasanik 340 millionit koruuninik atuivallaarsimanerat pissutaalluni ukiormannamut aningaasartuutaasussat naalagaaffiup politiivinit unitsinneqarput.
Allattoq Mads Lynge
oktobarip 20-at 2009 13:29
Politeeqarneq pillugu Kalaallit Nunaanni aaqqissuusseqqinneq aappaagu januaarip aallaqqaataani atuutilersussaavoq.
Politeeqarfiit tallimanngortinneqarnissaat pilersaarutaavoq, qitiusumillu piareersimasuutitaqarfissaq Nuummi pilersinneqarnissaa pilersaarutaagaluarpoq, maannali piviusunngunngitsuulerluni.
Aningaasartuutinik unitsitsineq peqqutaalluni qitiusumik Nuummi januaarip aallaqqaataaniit piareersimasuutitaqarfeqalernissaq unitsiinnarneqarpoq.
Qitiusumik piareersimasuutitaqarfissap upernaap ingerlanerani piviusunngorsinnaanissaa, politimesteriugallartup Bjørn Bayip neriuutigaa.
