Politiit oqaaseqarumanngikkallarput

Radioaviisimi ippassigami eqqaavarput Qaanaami toqutsisoqarsimagunartoq, Kalaallit Nunaanni Politimestereqarfimmiit maanna paasissutissat amerlanerulaartut nalunaarutigineqarput.
Allattoq Mads Lynge
decembarip 13-at 2007 10:13

Qaanaami politiit oqaluttuarput arfininngornermi decembarip aallaqqaataani, ullup qeqqata nalaani, arnaq 67-nik ukiulik angerlarsimaffimmini toqungasoq nassaarineqarsimasoq. Qaanaamilu politiit pisimasoq toqutsinertut misissorpaat, Naalagaaffiullu Pinerluttoqarsimatillugu Teknikkikkut Paasiniaasartuiniit misissuinerminni ikiorteqarlutik.

Arnaq toqungasoq nassaarineqarsimatsiartoq nukappiaraq 15-inik ukiulik tigusaraat sapaammilu decembarip ulluisa aappaanni toqutsisimasutut killisioreerlugu ulluni 25-ni tigummigallagassanngortillugu. Inatsisit tunngaviusut naapertorlugit killisiuineq matoqqasumik ingerlanneqarpoq.

Politiit suli paasiniaagamik pisimasumut tunngasut allat, sunalu 67-inik ukiullip toqqutigisimaneraa oqaatigerusunngikkallarpaat, politiit eqqartuussissuserisuat Henrik Pass ullumi nalunaarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq