Politiit nalilersueqqissaartarnerarput
Kristian Jørgensenip pania, ullumimiit nammineq ujarleriartorluni aallartoq angunni ulluni 13-ini maqaasineqareeraluartoq politiit ujaasiunnaarsitsinera pakatsissutigaa. Politiilli imminnut illersorput.
- Pisumiit pisumut nalilersuisarpugut. Paasissutissat tamarmik nalilersorneqareeraangata ujaasineq nangissanersoq unissanersorluunniit aalajangiiffigineqartarpoq. Kisianni Kristian Jørgensenimut tunngatillugu paasissutissanik nutaanik takkuttoqassagaluarpat soorunami nalilersueqqeriaannaavugut. politimestereqarfimmeersoq chefpolitiinspektør Jesper Kracht nassuiaavoq.
- Ilami. Kalaallit Nunaanni ujaasinerit imatut ittut ukiut tamaasa pisartut amerlaqaat, ajoraluartumik. Taamaammat suliat tigugaangatsigit nalilersoqqissaartarparput, qanoq sivisutigisumik suullu atorlugit ujaasisoqassanersoq, nangippoq.
Sila, angallat sunaanersoq, qanoq sivisutigisumik inuk maqaasineqarsimanersoq. Imaaniissimappat nunap iluani imaluunniit avataani pinersoq. Nunamiippat sumiinnera. Tamakkorpassuupput nalilersortuartakkavut, nassuiaavoq.
Kisiannimi nunarujussuuvoq ulluni marluinnarni ujaasiffigisimasarsi? Aperaarput.
- Politiit ujaasiffigisaat nunarujussuuvoq, allaammi Kristian Jørgensenip aavariaqataa ajunngitsoq nassaarisarput Heni Petersen peqatigalugu helikopterimik ujaasivugut. Taamaammat ujaasineq taamaatikkatsigu misigisimavugut sumiiffigisinnaasai tamaasa ujaasiffigisimallugit, akivoq.
Jesper Krachtillu erseqqissaatigaa aalajangiineq sunaluunniit - nutaanik saqqummertoqartillugu - allanngortinneqarsinnaasartoq.
- Paasissutissat tassaasariaqassapput inuup ujaarisap nanineqarnissaanik ilimanarsisitsisut. Imaassinnaavoq qaqqami inummik ujaarisamut assingusumik takusoqarsimasoq, imaassinnaavoq aamma sumiinneranik paasissutissiisoqartoq. Taamaattoqartillugu politiit ujaaseqqilernissaq nalilersortarpaat.
- Paasissutissanik nutaanik takkuttoqariarpat, Kristian Jørgensenip nassaarineqarnissaanik ilimanarsisitsisunik aammalu nukissanik suli atueqqinnissamut pissutissaqarpat taava politiit ujaaseqataaqqilersinnaapput, aap, Politimestereqarfimmi oqaaseqartitaq Jesper Kracht nassuiaavoq.
