Politiit naammagittaalliutigineqartaqaat
2005-imi Kalaallit Nunaanni politiit pillugit naammagittaalliuutit Danmarkimut naleqqiullugit malunnartumik amerlanerusimapput.
Tamanna naalagaaffiup eqqartuussisuunerata ukiumoortumik nalunaarusiaani saqqummeqqammersumi paasinarsivoq.
Tamatumunnga pissutaasut ilaat tassaasinnaavoq naammagittaalliornissamut pikkorinnerulersimanerput.
Naalagaaffiup eqqartuussisuunera ukiut tamaasa nalunaarusiortarpoq, nunatsinnilu politiit pillugit naammagittaalliuutit misissoqqissaartarlugit. Suliassat ataasiakkaarlugit iserfigisarpai qimerloorlugillu – soorlu politiit pisortaa pappiaranut toqqorsivimmut pappiaranik pingaarutilinnik qanoq toqqorsisarnersoq – taavalu naammagittaalliuutit kisitsisitaat katersorlugit, taamaalilluta isumannaatsuunissamut pissuserissaarnissamullu oqartussaasut pillugit ataatsimut paasisaqarsinnaaniassagatta.
Paasisat ilaat tassaavoq Kalaallit Nunaanni innuttaasumut ataatsimut naammagittaalliuutit suliassanngortut amerlassusiisa Danmarkimut naleqqiullugit malunnartumik assigiinngissuteqarnerat.
Imaaliallaannaq isumaqarnaraluarpoq tamanna politiit pisuussutigisinnaagaat, nalunaarusiamili allassimalluni pissutaasut ilagisinnaagaat naammagittaalliornissamut pikkorinnerulersimanerput. Naammagittaalliornissamut qanoq eqqarsartarnerput annertunerulersimavoq.
Nalunaarusiami ilaatigut politimesterimit tusagassiuutinut nalunaarut issuarneqarpoq pissutaasunut eqqoriaanerusoq. Tassani ilaatigut naammagittaalliuutinut pissutaasut allassimapput:
-Inuiaqatigiinni ineriartorneq, innuttaasut siornatigutulli pisortanut akuersaaginnarumajunnaarnerannik nassataqartoq naammagittaalliornissamullu eqqarsartarneq kinguneralugu – issuaaneq naavoq.
Naalagaaffiulli eqqartuussisuuneranit nalunaarummi maluginiarneqarpoq naammagittaalliuutigineqartartut ikilisinniarlugit politiit namminneq suliniuteqalereersut.
Politeeqarfinni tamani ukiaru ullut sammisaqarfiusut ingerlanneqassapput imatut qulequtserlugit ”Ilumut taamaaliorsinnaavugut”.
Politiit aammattaaq Kalaallit Nunaanni suliassaqarnerujussuartik aammalu pinerluttarnerit qanoq ittuunerat naammagittaalliuutit amerlanerujussuannut pissutaasutut oqaatigaat.
