Politiit misissuinerat suli kinguneqanngilaq

Angummik 19-inik ukiulimmik sapaatip akunnerata naanerani toqutsineq pillugu politiit annertunerusumik suli paasisaqanngillat, toqutsisorli ullut sisamassaanni suli tigusarineqarnani.
Allattoq Oline I. Olsen, Louise M. Kleemann
maajip 11-at 2011 11:32

Ilisimannissinnaasunik apersuinerit arlalippassuit arfininngormalli suliarineqartut, politiinit ulapputigineqaleruttorput.

Teknikerit naalagaaffimmi politiit qullersaqarfianneersut pisimasoqarfimmi misissuereerput, misissoqqitassallu Danmarkimut nassiunneqareerlutik.

Paasiniaaqqissaarnerit suli ingerlanneqarneri pissutaallutik, misissugassatut nassiussat suuneri oqaatigisinnaanagit Politimestereqarfimmi vicepolitiinspektøri Viggo Johansen oqarpoq.

Angutip 19-inik ukiullip arfininngormat ullaakkut aallaaneqarnermi kingorna ikimi aanaarnera toqutsigigaa, toqungasunik pilaasartup misissuinerata paasinarsisippaa.

Toqutsisimasumik suli tigusarinnittoqannginnera innuttaasunik toqqissisimajunnaartitsivoq. Politiit tungaanniit  tamanna pillugu  qanoq oqaaseqarsinnaavisi?

- Innuttaasut qanoq oqalunnersut oqaaseqarfigisinnaanngilara, kisianni toqqissisimanngittoqarpat taava politiinut saaffiginninnissaq periarfissaavoq, Viggo Johansen oqarpoq.

Innuttaasut toqutsinermut tunngasunik takunnissimasinnaasut tusagaqarsimasinnaasulluunniit Ilulissani politiinut saaffiginneqquneqarput oqarasuaat 94 32 22.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq