Politiit kalaallit unioqqutitsisartut amerlanerpaapput

Kalaallit politiit inatsisinik akulikippallaartumik unioqqutitsisarput, naak inatsisinik atortitsisussaagaluarlutik.

Danmarkimi aviisi, Nyhedsavisen, DR naapertorlugu, taama allappoq.

Kalaallit politiit aqqaneq-marluk pissusissanik malinnilluangitsutut siorna pineqaatissinneqarput, tassa politiit agguaqatigiissillugu quliugaangata qulingiluat pineqaatissinneqarsimallutik. Naalagaaffeqatigiinnerup sinnerani politiit 145-ngata ataaseq malinnilluanngitsutut pillagaasimavoq.

Kalaallit politiit unioqqutitsisarnerujussuat nunarsuatsinni ilumut annertunerpaasoq, Kalaallit Nunaanni Politiit Peqatigiiffiani sulittaasup, Aqqaluk Petersenip, nassuerutigaa.

- Kalaallit Nunaanni politiit suliassaat Danmarkimi politiit suliaannut naleqqiullugit tamaviaarnarnerujussuusarput. Peqqarniisaarnerit, kinguaassiuutitigut atornerluinerit imminullu toqunnerit Kalaallit Nunaanni amerlanerujussuupput. Kalaallit politiit ulloq unnuarlu aamma sumulluunniit aggersarneqartuaannarput. Tamanna ilungersunartorujussuuvoq, politiillu ilaat taamaalillutik ilaanni immaqa naleqquppaallaanngitsumik iliuuseqarsinnaasarput, Aqqaluk Petersen oqarpoq, amerlanerusunillu politiinngorniartoqarnissaa ujartorpaa, sakkortuunillu pisoqarsimatillugu ajunnginnerusumik ikiuigasuartoqartarnissaa aamma ujartorlugu.

Naalagaaffiup politiivisa naatsorsuinerisa takutippaat, suliassat Kalaallit Nunaannut tunngasut tassaakkajuttut peqqarniisernerit, aserorterinerit suliffimmillu sumiginnaanerit. Pineqaatissiissutit assigiinngitsuupput, mianersoqqussutiniit soraarsitsinernut.