Politiit: Innuttaasut attaveqarfigilluartariaqarpagut

Kalaallit Nunaanni politiit pillugit naammagittaalliuutit ikilisarneqassappata, innuttaasut politiillu akornanni qaninnerusumik attaveqaqatigiittoqartariaqarpoq. Taama isumaqarpoq Kalaallit Nunaanni politiit peqatigiffianni siulittaasoq Aqqaluk Petersen:

- Innuttaasut suleqatiginissaat avaqqunneqarsinnaasorinngilara. Piffinniit piffinnut sakkortuumik pisoqarfiugaangami politiit annertuumik akuusarput, innuttaasunullu pitsaasumik kiinnertarnissarput pingaaruteqarpoq. Politiit akornanni oqallinneq ataavartumik piusariaqarpoq, Aqqaluk Petersen oqarpoq.

Naalagaaffiup eqqartuussisuunerata ukiumoortumik nalunaarusiaani, saqqummersinneqaqqammersumi, atuarneqarsinnaavoq Kalaallit Nunaanni politiit pillugit naammagittaalliuutit Danmarkimut naleqqiullugit malunnartumik amerlanerusimasut.

Danmarkimulli naleqqiutissagaanni kisitsisit allaanerannut pissutaasorineqartut assigiinngeqaat.

Politiit pissusilersortarnerat pissutaaginnarani innuttaasut naammagittaalliornissamut pikkorinnerulersimanerat taaneqarpoq.

Nunatta politimesteria Steen Thomsen oqarpoq, politiit namminneq iliuuseqarnermikkut naammagittaalliornerit ikilisarsinnaagaat:

- Anguniagassatta pingaarnersaat tassaavoq naammagittaalliuutigineqannginnissaq. Immitsinnut qiviartariaqarpugut, qanorlu ileqqulersortarnissarput misissortariaqarlutigu, Steen Thomsen oqarpoq, nangillunilu:

- Arlaannik pisoqartillugu iliuuserisimasarput nalilersortariaqarparput, taamaalilluta innuttaasut pitsaanerusumik sullinniassagatsigit, Steen Thomsen naggasiivoq.

Politiit pillugit naammagittaalliuutit siorna 25-iusimapput, 2004-mut naleqqiullugu ikinnerullutik. Taamanikkut naammagittaalliuutit 31-usimapput.