Politiit immikkoortortaqarfikkaalerput
Tunup immikkoortortaa, Kujataata Immikkoortortaa, Illoqarfiit pingaarnersaat, Qeqqani immikkoortortaqarfik kiisalu avannaani immikkoortortaqarfik, politiini taakkua immikkoortut tallimat pilersinneqalerput, taamatut nassuiaavoq politimesteriugallartoq Bjørn Bay KNR-imut.
Immikkoortortaqarfimmi aqutsisoq politikommissærimik tullersorteqalissaaq, taakkualu sulisutik nikerartissinnaanngorlugit illoqarfinnut akisussaaffigisaminnukartissinnaanngussavaat. Immaqa hashi pillugu misissugassamut annertuumut imaluunniit pinaveersaartitsineq pillugu suliamut tunngatillugu illoqarfimmut allamut suliartortitsisoqarsinnaalissaaq. Taamaasilluni sulisut oqilisaaffigineqartalissapput ulluinnarni sulinerminni, Bjørn Bay oqarpoq. Erseqqissaatigaali illoqarfimmi ataatsimi politiit ikinnerpaaffeqassammata.
- Innuttaasut sullilluarneqarnerulissapput sulisut amerlinngikkaluarlugit, ikilisaanngikkaluarluniluuunniit. Aaqqissuussinerli politiinik atorluaanerulissasoq naatsorsuutigaarput, Bjørn Bay KNR-imut oqarpoq.
