Politiit illuutiminnik aserfallatsaaliinissamut akissaqanngillat. Tamanna ukiumoortumik nalunaarummi 2004-mut tunngasumi takuneqarsinnaavoq.
Illunut iluarsartuussinissamut aningaasat katillugit 600.000 koruunit immikkoortinneqarsimapput, iluarsartuutassanullu pilersaarutaanngitsunut 200.000 koruunit immikkoortinneqarsimallutik. Politiilli illuutaannut 40-t sinnerlugit amerlassusilinnut aningaasat naammanngillat.
Tamatuma kingunerisaanik, illorpassuit aserfallalersimapput, politiillu illuutitik ajorsilluinnaraangata iluarsartuunnissaannut akissaqannginnertik pissutigalugu tuniniartariaqalertarpaat.
Assersuutigalugu Qasigiannguani politeeqarfiup pisortaata illua isertitsivittalik 2003-mi tunineqarpoq, nutaamillu pitsaanerusumik taarserneqarluni.