Politiit Greenpeacemit ulapisinneqarput
Tamassuma kinguneraa politiit suliassaat allat kinguartinneqartariaqarsimanerannik:
- Greenpeacekkormiut qillerivimmut qallornerisa kingorna, politiinit ulluinnarni suliarineqartartut allat tunulliunneqartariaqarsimapput, vicepolitimester Morten Nielsen KNRimut oqarpoq.
Suliassat tunulliunneqartut tassaasimapput pinerluttoqareerneratigut misissuinerit naliginnaasut aammalu pinerlunnernik pinaveersaartitsinerit.
Greenpeacekkormiut ulapputigineranni aningaasartuutit qasserpiaasimanersut Morten Nielsenip oqaatigerusunngilaa, taamaattorli oqarpoq:
- Greenpeacekkormiut suliakkersuinerisigut soorunami politiit amerlanerit sulisittariaqarsimavagut. Tamassuma saniatigut sulinngiffeqartunik aggersaanerput aningaasartuutigisimallutigu aammalu sulisut ullormusiaqartsinneri soorunami aningaasartuutaasimapput. Taakku saniatigut eqqartuussivilersuussinerit aningaasartuutaapput aammalu eqqartuunneqartut Nunatsinnit anisitaanissaannut aningaasartuuteqarluta. Taamaakkaluartoq qanoq amerlatigisunik aningaasartuuteqarsimanerput oqaatigerusunngikkallarpara, Morten Nielsen oqarpoq.
Eqqartuunneqartut Nunatsinnit anisitaanissartik namminneq akilertussaagaluarpaat, taamaaliorsinnaanngikkunilli Naalagaaffiup akiliukkallarsinnaallugit kingusinnerusukkut akiligassaannik.
Nunatsinnit anisitaasussat Europamit nunanit arlalinneersuupput, ilaatigut Hollandimiit, Tuluit Nunaanniit, Italiamiit, Ungarnimiit, Spaniamiit, Sverigemiit aammalu Finlandimiit. Nunatsinniit Europamut timmisartukkut maannakkut akiusut naapertorlugit, Radioaviisimiit naatsorsuinitsinni paasivarput, Nunatsinnit anisitaasut 20-usut tamarmik katinneranni 100.000 koruuninik aningaasartuuteqartoqartussaassasoq.
Aningaasartuutit taakku saniatigut Nuummi politiit piaartumik inunnut 18-nut isertitsiviusinnaasunik pissarsisariaqarsimapput. Morten Nielsenip oqarnera naapertorlugu ataatsikkut 18-nik isertitsivimmut inissiinerit naliginnaasimanngillat. Taamaaliornerlu Naalagaaffimmit akilerneqartarpoq aamma maani Kalaallit Nunaanni atuuttumik.
Qillerutip Leiv Eiriksson Nunatta imartaanut pimmalli Kangilinnguani Sakkutooqarfiup taanna nakkutigisarilerpaa, aammalu qilleriffissaanut pimmalli 500 meteri tikillugu palleqqusaanngitsumi nakkutilliisimalluni.
Nunatta imartaani Sakkutooqarfiup umiarsuit nakkutilliisui pingasuusut ilaneqarnissaat pisariaqarsimanngitsoq Kangilinnguani Sakkutooqarfiup tusagassiutinut avammullu nalunaartartuisa radioaviisimut oqaatigaat.
