Politiit filmiliulersut

Nunatsinni politiit pingasunik naatsunik filmiliornialerput – taakku aqqutigalugit persuttaanerit aallaavigisinnaasaat persuttaasoqareeraangallu kingunipiluit suunersut takutinniarneqassapput.

Danmarkimi inatsisinik atortitsinermut ministereqarfiup pinerlittaalisitsinermut aningaasaaqarteqarfianit aningaasat nunatsinni politiinut tunniunneqaqqammerput.

Politeeqarfiit arlallit 1998-imiilli pinerlittaalisitsiniarlutik suliniuteqartarput taaguuserlugu ”persuttaannata oqaloqatigiiginnarta.” Atuartitsinermi videomik immiussat minillugit suliniut taanna nunatsinni pissutsinut tulluarsarneqareerpoq.

Immiussami minitat ilanngullugit nunatsinnut tulluarsarneqassasut politiinit kissaatigineqarsimammat danskisut allagartalersukkamik kalaallisut videoliornissaq anguniarlugu aningaasanik qinnuteqartoqarpoq.

Aningaasat akuersissutigineqareermata politiit pingasunik naatsunik nunatsinni inuusuttunik pinerlittaalisiniarluni atorneqartartussanik filmiliorniarput.