Politiit Facebookikkut saaffiginneqqusinngitsut

Kalaallit Nunaanni Politiit oktobarip qaammataani Facebookkitaarput maannalu 3500-t sinnerlugit Likerneqareerlutik. Innuttaasut Facebook aqqutigalugu politiit attaveqarfigisarpaat. Nakuusertoqarsimatillugu takunnissimasinnaasunik ujaasinermi, tatsit sikusimasut navianarsinnaanerinik ilisimatitsinermi allarpassuarnillu innuttaasunut paasissutissiisinnaasarput. 

Innuttaasut politiit oqariartuutaat namminneq facebookiminni ingerlateqqittarpaat. Tamanna takutiinnarpaa politiit attaveqariaasaat innuttaasunit iluarineqartoq. 

Ajornartorsiuteqarporli. Tassa innuttaasut Politiit Facebookiannut paasissutissanik ikkussisalersimapput. Assersuutigalugu meeqqat aqquserngup qeqqanut innarlutik biilit qanilligaangata qimaapallattarlutik pinnguartut politiit Facebookianut ikkunneqarsimavoq, politiit qularnanngitsumik iliuuseqarnissaat kissaatigineqarluni. Pasissutissalli taamaattut politiit atorsinnaasanngilaat. Tassami allassimanngilaq qanga sumilu pisoq pisimanersoq. 

- Malinnaavigineqarnerput nuannaarutigaarput, ” like ”-erneqarnerput, allagarsiivimmilu ilanngussat ingerlateqqinneqartarneri aamma nuannaarutigaagut. Taamaattorli erseqqissaatigissavarput, politiinut nalunaaruteqarusukkussi imaluunniit pisumut aalajangersimasumut unnerluusserusukkussi, facebookkikkut pisinnaanngimmat, malittarisassanittaaq nittartakkami erseqqissarneqarpoq, politiit Facebookiminni allapput. 

- Politeeqarfinnut ornigullusi imaluunniit oqarasuaatikkut mailikkulluunniit attaveqarnerit pissapput. Namminneerlusi pillarneqaataasinnaasumik takunnikkussi, soorunalimi piaartumik oqarasuaatikkulluunniit saaffigissavatsigut, pisoqarfimmut piaartumik ornigussinnaaniassagatta, nangillutik allapput.

Politiit nittartagaanni www.politi.gl-imi politeeqarfiit saaffigineqarsinnaasut takuneqarsinnaapput.