Politiit ataqqineqarpallaarunnaarput

Nunatsinni, nunanilumi allani, innuttaasut politiinut ataqqinninnerat oqaluttuaannanngorsimagunarpoq.

Politiit arlalitsigut apeqquserneqartaleraluttuinnartut, politiinngorniat, Lars Knudsen aamma Arne Reimer, isumaqarput.

- Praktikkileqqaarama assut malunnarpoq inuit politiinik iluamik soqutigisaqanngitsut, pingaartumik sapaatip akunnerata naanerani. Kisianni illoqqarfinni allani politiinut ataqqinninnerullutik, tamanna malunnartorujussuuvoq. Kisianni soorunami ulluinnarni maani Nuummi malunnarneq ajorput, ajunngittartorujussuugaluarput.

- Illoqarfimmi allami praktikkernitsinni aamma maluginikuuvarputinuit politiinut isiginnittariaasiat allaanerujussuusoq, soorlu sinerissami inuusuttut politiinut ataqqinnittorujussuupput, kisianni maani Nuummi malunnarsiartorpoq ataqqinninnerat immaqa annikilliartortoq, neriuppungali tamanna iluarsiumaartoq, politiinngorniaq Arne Reimer oqarpoq. Politiinngorniat sapaatip akunnerini marlunni tullerni oqaluttariarsorlutik, allattariarsorlutik timigissarsimassusertillu soraarummeerutigissavaat.