Angut alla Hans Egedemut eqqaassutissamik serlersaareqataasimasutut unnerluutigineqartoq
Angut alla Nuummi Hans Egedemut eqqaassutissamik serlersaarisimasutut pasineqarpoq. Eqqaassutissaq inuiattut ullorsiornerup ullaassaani aappaluttumik qalipanneqarpoq allattuiffigineqaluni.
Kalaallit Nunaanni politiit KNR-mut tamanna uppernarsarpaat.
- Angutit marluk killisiorneqareerput, pinngitsuunerarpullu. Inuit arlaqartut serlersaarisimasinaanerat ilimagivarput, pinerluttoqarsimaneranillu paasiniaaneq suli ingerlanneqarpoq, annertunerusumillu maannakkut oqaaseqarsinnaanngilagut, Kalaallit Nunaani politiini attaveqaqatigiinnermut sulisoq Camilla Palmann oqarpoq.
AAMMA ATUARUK Angut eqqaassutissamut serlersaarinermut atatillugu pasineqartoq
Eqqaassutissallu serlersaarnerata kingorna aningasaartutit qanoq amerlatiginersut aamma paasiniarneqarpoq.
Eqqaassutissap serlersaarneqarneranut pasineqartut maanna marluusut angutaapput. Aappaa 30-t sinnilaarlugit ukiulik serlersaarnerup kingorna unnerluutigineqarpoq. Angutillu aappaa serlersaarisutut pasineqartoq 20-t sinnilaarlugit ukioqarpoq.
Angutit pasineqartut eqqaassutissamik assingusumilluunniit pisortat pigisaanik serlersaarisimasutut pinerluttulerinermut inatsit 46 naapertorlugu unnerluutigineqarput.