Politiit angummik Christiania-mi tigusarinnimmata ujaqqanik milloorneqarput
København-imi politiit Christianiami angummik tigusarinniniartillugit ujaqqanik milloorneqarsimapput, tamatumalu kingunerisaanik ujaqqanik milloortut gas-imik qulliliornartumik miloriussiffigineqarsimallutik.
København-imi politiit pigaartuisa aqutsisuata oqarnera malillugu, eqqissiviilliornerit aallartissimapput, angut politiinut saassussisoq tigusariniarneqarnerani politiit ujaqqanik milloorneqarsimammata. Angut politiinut saassussisoq politiit tigusarisimavaat, Grå Hal-illu eqqaatigut Christiania-mit anninniaraluarsimallugu. Politiit angummik tigusarinnittut inunnit 100-iniit 200-inut amerlatigisunit malinneqarlutik ujaqqanik milloorneqarsimapput, politiit pigaartuat aviisimut politiken-imut oqaluttuarsimavoq.
Eqqissiviilliortoqalernerani politiit angut tigusarsartik iperartariaqarsimavaat gas-imillu qulliliornartumik ujaqqanik milloortunut miloriussisariaqarsimallutik, imminnut illersorniarlutik. Politiit nalunaarutigaat politiit 35-it Christiania-miitinneqartut, pilersaarutigaallu angut tigusarisimasartik tigusareqqinniarlugu, kisianniligooq suna tamaat akigalugu taamaaliornianngillat.
”maannakkut eqqissilluta angut tigusariniarsaraarput, tamannalu unnumanna siunertaraarput, politiit oqaluttuarput, naatsersuutiginngilarput eqqissiviilliortoqqaqqinnissaa, København-imi politiit pigaartuat oqaluttuarpoq.
Christiania-mi tusagassiortunut tusagassiisartoqatigiit oqaluttuarnerat malillugu maannakkut Christiania-mi eqqissisimaneqartoq, unnugumigooq Fredens Eng-imi Cirkus-imik takutitsisoqartussaammat.
