Politiit: Angerlarsimaannartussaatitaanerni niuertarfissioruit akiligassinneqassaatit
Pisiniat qulit missaanniittut Danmarkimit tikeqqammersut sulisunit anisinneqartariaqarsimasut, Nuummi atisaarniarfik ilisimatitsivoq.
Inuussutissaanngitsunik soorlu atisanik angerlarsimaannartussaatitaanermi niuerniarneq akisunaarneqarsinnaavoq.
Taamaaliornermi mianersuaalliornertut isigineqarsinnaasoq, Nunatta Politiivi isumaqarput.
Angerlarsimaannarnissamut malittarisassat
- Nunatsinnut tikikkuit ulluni tallimani angerlarsimaannassaatit.
- Ullut tallimassaanni misissorteqqissaatit.
- Angerlarsimaannarnerup nalaani pisuttuarsinnaavutit, najugaqatigisatit attavigisinnaavatit aamma ulluinnarni atortussanik pisiniarsinnaatitaallutit.
- Pisiniarnissannulli anersaartuutinut illersuummi kiinnamulluunniit assersuummik atugaqassaatit.
- Allanut pulaassanngilatit, pulaartoqassanngilatit, aaqqissuussinernut peqataassanngilatit, bussissanngilatit, taxassanngilatit suliartussanallu.
- Ullut tallimassaanni misissorteqqinnianngikkuit tikinninniit ullut 14-it angerlarsimaannassaatit.
- Atisanik pisiniarnissaq pisariaqavissutut isigineqarsinnaanngilaq aamma soorlu ikiaqutinik amigaateqaraanni tamakkumi siumungaaq eqqarsaatigereerneqarsinnaapput, Nunatta politiivisa unnerluussisuisa pisortaat, Morten Nielsen oqarpoq.
AAMMA ATUARUK Atisaarniarfiup angerlarsimaannartussaagaluarlutik pisiniartut anisikkai
Taamaakkaluartoq pisiniat qulit missaanniittut Danmarkimit tikeqqammersut, Nuummi atisaarniarfimmi Nuka Din Tøjmandimi sulisunit anisinneqartariaqarsimasut, atisaarniarfiup pisortaata tullia, Charlotte Andreassen oqarpoq.
- Sapaatip akunnera kingulleq ullut pingasut ingerlanerani inuit qulit missaani anisippagut.
Inuit anersaartuutinut assersuuteqanngitsut qassiiusut
Kalaallit Nunaanni Politiit angerlarsimaannaqqusaanermut malittarisassanik unioqqutitsisut misissortarpaat.
- Nalunaarutigineqartut tamaasa misissuiffigisarpagut. Susoqarnera apeqqutaalluni pisumut erngerluta takkusinnaavugut kisiannili sulisussaqarniarnerput tamassumani aamma apeqqutaavoq.
AAMMA ATUARUK Inuit pingasut angerlarsimaannaqqusaanermi unioqqutitsisut akiligassinneqartut
Nunatsinnut tikittuni angerlarsimaannaqqusaanermut malittarisassanik naapertuisimanngitsunut 6.000 koruuninik akiligassiisoqartareerpoq, atisaarniarfmmiillu anisitaarsariaqarsimasut akiligassinneqarsimanersut apeqqutigaarput:
- Uppernarsarsinnaavarali inuit pisariaqanngitsunik atisarsiniartut akiligassinneqartarmata aamma inuussutissanik pisiniarfinni qanermut assiaquteqaratik pisiniartut akiligassinneqartarput, Nunatsinni politiit unnerluussisuisa pisortaat, Morten Nielsen, KNR-imut oqarpoq.
Malittarisassat naapertorlugit nunatsinnut tikinnermiit ulluni tallimani pinngitsoornak angerlarsimaannarlutillu tikinninniit ullut tallimassaanni misissorteqqissaatit.