Politiinut nakuusertoq pineqaatissinneqapallattoq

Narsami Politiit sisamanngormat unnulaaraa, nalunaaqutaq arfineq-marluk missaanni, Narsami angerlarsimaffiit ilaanni eqqissiviilliortoqarneranik nalunaarfigineqarput, politiillu marluk ingerlaannaq tassunga angerlarsimaffimmukarput.

Aappariit imigassartungaatsiarsimasut aaqqiagiinngitsut paasineqarpoq. Taakku immikkoorlutik angerlarsimaffimmiit aneqquneqarput.

Arnap tamanna naammaginngilaa. Politiip aappaa arnap marloriarluni tassanngaannaq tilluppaa, kiinaatigut qungasiatigullu eqqorlugu, politiit ilisimatitsipput.

Arnaq pisortanut kanngunarsaasutut pisuutinneqarluni ingerlaannaq tigusarineqarpoq.

Arnaq aqaguani ulloqeqqata siorna killisiorneqarpoq, unnerluussassanngortinneqarnissaalu kinguninngua aalajangerneqarpoq.

Suliassaq Qaqortumi eqqartuussivimmut ippassaq ualikkut tunniunneqarpoq, arnallu kanngunarsaasimanini pissutigalugu ulluni 30-ni isertitsivimmiitinneqarnissaa nalunaaquttap-akunnera ataaseq qaangiutiinnartoq aalajangerneqarpoq.

Politiit tusagassiuutinut nalunaarumminni allapput: "Kalaallit Nunaanni Politiit paasinninnerat naapertorlugu, inunnut suliaqartunut - soorlu politiinut - nakuuserneq akuerineqarsinnaanngilluinnarpoq. Taamaammat sukkasuumik iliuuseqartoqarnera, arnallu pineqaatissinneqapallannera naammagisimaaqaarput".